Conclave on Cocoa-ah Agri. Minister tel

Agriculture & Farmers’ Welfare minister PC Vanlalruata chu nimin khan Assam Agriculture University, Jorhat-ah sorkar laipuia Directorate of Cashewnut & Cocoa Development (DCCD) buatsaih 'National Conclave on Cocoa-ah khuallian a ni.

PC Vanlalruata chuan, India ramin chocolate siamna atana cocoa a mamawh zat metric ton 1,20,000 aṭangin metric ton 22,000 chauh a thar thu sawiin, "Cocoa hi chocolate siamna atan bakah, damdawi siamna industry lamah te, cosmetic siamnaahte leh chhang siamna lamahte a ṭangkai em em a ni," a ti.

Agriculture Minister hian DCCD hotute chu Mizoram tlawh a, kut hnathawktute zirtir tur leh Mizoramah cocoa nursery dinpui turin a sáwm a; DCCD hotute chuan tihhlawhtlin ngei an tum thu an hrilh.

Mizoram sorkarin National Mission on Edible Oils (NMEO) hnuaiah oil palm chìn a kalpui mek thu leh NMEO-Oilseeds hnuaiah tung chìn chu nasa lehzuala kalpui tum a nih thu Minister chuan a sawi a, "Kut hnathawktute’n hlâwkna an têl tam lehzual theih nan thlai chìn pawlh (inter-cropping) kalpui tum a ni a, oil palm leh tung karah hian inter-cropping tur atan cocoa hi a ṭha hle dawn a ni," a ti.

PC Vanlalruata chuan, "Eng thlai pawh chíng dawn ila, a pawimawh hmasa ber chu kut hnathawktute'n a chi ṭha an dawn ngei theihna tura hmalak a ni," a ti a, DCCD thawhpuina Mizoramin a mamawh thu a sawi.

National Conclave hi DCCD director Dr Femina chuan a kaihruai a; state hrang hrang aṭangin kut hnathawktute leh mithiamte an tel. Agriculture Minister hi director R Lalnunzira leh consultant Tlangtimawia Zote ten an ṭawiawm a ni.