UGO Electric bill software thar tlangzarh

Power & Electricity minister F Rodingliana chuan nimin khan PE Engineer-in-Chief conference hall-ah UGO Electric Billing Software thar a tlangzarh a; PE department hotute chu ram tan dawhkan aṭanga rawngbawlna mai ni lo, field worker ni thar leh turin a chah.

F Rodingliana chuan, Mizoramah a vawi khat nana electric billing system chi khat hman a ni dawn tih a sawi a, "Hmasawnna lawmawm tak a ni. Kan department hi a pawimawh em em a, ni hnih khat harsatna a awm chuan ram pumin kan tuar nghal ṭhin. Chuvangin, kan hnaah hian thil a nih tur ang ni lote chu a nih tur ang a nih theih nan ṭan kan lak a ngai a, hotute lam pawh dawnkan rawngbawlna mai ni lo, field worker ni thar turin ka sawm che u. Kan hna hi keimahni tan ni loin ram tan a ni tih hre thar ang u," a ti.

Central scheme hrang hrang aṭanga sum tam zawk hai luh a pawimawh thu sawiin Minister chuan, engineer-te chu Mizoramin a chhawr ṭangkai theih turte zir chianga dap turin a chah a, "Hmun hrang hranga kan harsatna lian ber - transformer indaih lohnate phuhru turin transformer thar leina tur budget-ah pawisa dah belh a ni a, tunah transformer thar 60 dang lei belh leh tura buaipui mek a ni," a ti a; Mizorama transmission line pawimawh zualte double source nei vek tura hmalak mek a nih thu a sawi.

Inkhawm hi PE E-in-C JH Malsawma'n a kaihruai a; PE secretary K Lalrinzuali pawhin thu a sawi. Revenue drive khârna hunhman nghal a ni a, revenue hmu ṭha leh ATC loss nei tlemte hnenah lawmman hlan niin, ATC loss nei tlem ber chu Distribution Sub-Division-III, Aizawl a ni. Electrical accident chungchang inzirtirna video tawi insiamsiak result puan a ni bawk.

UGO ELECTRIC BILLING SYSTEM SOFTWARE

☑ Inventive Solution kut chhuak a ni a; Cloud base niin, Android leh IOS application hmangin online-a bill pek theih a ni.

☑ March 2025-ah pilot project atan Rural Sub-Division leh Distribution Sub-Division-III-ahte hman chhin a ni.

☑ May 2025 aṭangin district khawpui hrang hrangah hman niin, August 1, 2025 aṭangin Mizoram pumah hman a ni.

☑ Mizoram pumah electric consumer 3,10,130 an awm a, chu'ng zinga 2,01,843 chuan August 2025 bill an pe tawh.

☑ Bill dawn tawh zawng zawng cheng vbc 17.73 a ni.

☑ Online payment-a bill dawn zat vbc 9.92 a ni a, offline (bill counter)-a bill dawn zat vbc 7.81 a ni.