KHAWTHLIR

Thisen pe

Nimin khan Mamawii Higher Secondary School NSS chuan an sikul silver jubilee lawmna pualin an sikulah thisen pek an huaihawt a, Civil Hospital, Aizawl tan thisen unit 50 an pe a, petute mipa 42 leh hmeichhia pariat an ni. 1st Mizo NCC pawhin Civil Hospital, Aizawl blood bank-ah kalin thisen unit 34 an pe a, petute mipa 23 leh hmeichhia 11 an ni.

Career guidance

Siaha Officers’ Club chuan nimin khan MADC Golden Jubilee Hall-ah zirlaite tan Career & Vocational Guidance Programme an buatsaih. Vaihpi High School-a zirlai 160 hnenah an hma huna an kawng zawh theih turte an kawhhmuh bakah, zawhna leh chhanna hun hman a ni.

Saikuti Hall enfiah

Lunglei Municipal Council (LMC) hotute chuan nimin khan Saikuti Hall an tlawh a, chei ṭhat dan tur, enkawl zui dan tur leh hmalak dan tur an enfiah a; LMC chairman Lalzuithanga, vice chairman K Lalrinawma, executive councillor pahnih Zorinsanga Hmar leh Lalhruaitluangi Sailo, councillor Lalmuanpuii Renthlei leh official-te an tel. Saikuti Hall hi Rural Development & Administration department hnuaia Managing Board-in an enkawl ṭhin a, August 21, 2025 aṭang khan LMC kutah a awm ṭan a ni.

Lawmna leh thlahna

Lunglei Nursing School chuan nimin khan an hmunah zirlai tharte (batch 31-na) lawmna leh zirlai chhuak turte (batch 28-na) thlahna hun an hmang a, principal C Rothangpuii'n zirlai tharte lawmna leh zirlai chhuak turte thlahna thu a sawi. Lunglei Nursing School hi kum 1995-a din a ni a, kum tin General Nursing & Midwifery zir tur mi 20 lak ṭhin a ni.

Lirthei tlân dan

Traffic SP Ruatsanga Ralte chuan Aizawla lirthei tlân dan thar August 25, 2025-a enchhin tur a tichhuak a, Zarkawt Traffic Point aṭanga Zarkawt Valley lamah zing dar 8:30 - 9:30 inkarah LMV chin chung lam tlan phal a ni lo tih a tarlang. Thupek hian chhiatrupna thil, kângmei leh rîkrum thila chêt velna a huam lo.