ZMCH-a cabin, ward leh ICU thar hawng

23rd August, 2025

Zoram Medical College & Hospital (ZMCH) chuan nimin khan an hmunah National Quality Assessment Standards (NQAS) certified hospital an nih an lawm a, Health & Family Welfare minister Lalrinpuii leh bialtu MLA Baryl Vanneihsangi Tlau ten an hmanpui. Minister hian ZMCH-a private cabin 30, ICU khum 13 leh ward hrang hranga khum 54 a hawng.

HFW Minister chuan, Mizoram sorkara Mizoram Health System Strengthening Project (MHSSP) leh World Bank ṭang dun hmalakna, Internal Performance Agreement (IPA) chu sorkar damdawi-inte'n kum nga chhungin kum khatah an thawh ṭhat dan azira pawisa ṭum li an dawn theihna a nih thu a sawi a, "Pawisa hmang hian sorkar damdawi-inte'n quality lamah hmalakna an kalpui a, NQAS certification an neih theih nan IPA ngawrh taka kalpui a ni," a ti.

NQAS hnuaia MHSSP hmalakna kaltlanga Mizoram damdawi-in 42-in national certification an hmu chu a lawm thu sawiin Lalrinpuii chuan, "ZMCH-in certification sang ber, Platinum Category a ni thei hi a ropui," a ti a; NQAS leh IPA assessment hrang hrang atana thawktute thawhrimna fakawm a tih thu a sawi.

Health Minister chuan, Mizoram Universal Health Care Scheme kalpui a nih aṭangin ZMCH chu damlo dawng tam tam ber a nih thu sawiin, "Sorkar hmalakna tihpuitlin a nih theihnaa sûlsutu pawimawh takte zinga mi a ni a, private cabin, ward leh ICU khum te, department thar hawn belhte hi mipui tan ṭangkai taka hman a nih zel theih nan thâ thlak loin ṭang zel ang che u," a ti.

Bialtu MLA Baryl Vanneihsangi pawhin thu a sawi bakah IPA secretary & Quality Team advisor Dr Evelyn Lalremsangi Hmar, Directorate of Nursing assistant director Lalbiaknguri leh medical superintendent Prof. Zoramthara Zadeng ten thu an sawi bawk.

NQAS national certification lawmnaah hian award hrang hrang - Director’s Award, Medical Superintendent's Award, Nursing Superentindent’s Award te sem a ni a; department tiṭha zual pariat - Labour Room, Maternity OT, Paediatric OPD, Paediatric Ward, SNCU, Blood Bank, Casualty leh General Administration te hnenah lawmman hlan a ni.