PHC pahnihin NQAS an hmu thar

India rama sorkar damdawi-in ṭha tehna, National Quality Assurance Standards (NQAS)-ah primary health centre (PHC) pahnih - Lungdai PHC leh Rawpuichhip PHC an tling thar. Heti hian Mizorama sorkar damdawi-in 44-in NQAS national certificate an hmu tawh.

National Health Mission, Mizoram mission director Dr Lily Chhakchhuak tarlan danin, NQAS tehnaah hian Lungdai PHC-in 92.92% a hmu a, Rawpuichhip PHC-in 84.67% a hmu thung. Mizorama PHC zingah NQAS national certificate hmu PHC 31 an awm ta a ni.

Rawpuichhip PHC hi Aspirational Block Programme (ABP) hnuaia target zinga mi a ni a; Mizorama ABP block pathum - Reiek, Lungsen leh Ngopa RD block huam chhungah NQAS state certification hmu tawh damdawi-in panga awm a awm a, chu'ng zinga pathum chuan NQAS national certification an hmu tawh a ni.

Mizorama sorkar damdawi-in zingah NQAS national certificate hmu damdawi-in 44 a awm tawh a; tunah hian sorkar damdawi-in dang 20-in state level certificate an nei a, national certificate result nghak mek an awm rih lo thung.

NQAS national certification dawng tur hian endikna chhawng thum paltlang a ngai a, a tawp bera endikna, National External Assessment-ah 70% tal hmuh tlin a ngai a ni.