Bána Kaih (Handholding)ah loan Dilna 11,439 zinga 668 pawm tawh

Bána Kaih (Handholding) Scheme hnuaia loan component thawh khatnaah dilna 11,439 zinga 668 pawm a ni tawh a, September 20, 2025 aṭangin a thawh hnihna atan dilna thehluh theih beisei niin, chak zawka DPR siam leh endik a nih theih nan software thar duan a ni.

Chief minister Lalduhoma kaihhruaiin August 22, 2025 khan CMO conference hall-ah Mizoram State Policy Coordination Committee an ṭhu a; Bána Kaih (Handholding) scheme hnuaia loan component thawh khatna (pilot phase)-a hmalakte an thlir let bakah, a thawh hnihna atana inbuatsaihnate an sawiho.

Ṭhutkhawma tarlan danin, Bána Kaih scheme hnuaia loan component thawh hnihna atan September 20, 2025 aṭangin dilna thehluh theih beisei a ni. A thawh khatna (loan component)-ah dilna 11,439 a lut a, loan pek theiha pawm 668 an awm tawh a, endik leh deuh ngai 62 a la awm bakah, diltute DPR siamsak tur Mizoram Khadi and Village Industries Board (MKVIB)-a thawn mek 58 a awm.

Adviser to CM (Handholding) Dr KC Lalmalsawmzauva chuan, loan component thawh hnihna atan Bána Kaih Loan Component software thar duan a nih thu a sawi a; loan diltuin software hmanga a mamawh data-te a dah luh kim chuan software-in DPR a siam chhuah (generate) theih thu te, hei hian DPR siam leh endikna lama hun rei tak hman ngai ṭhin chu a tihtawi dawn thute a sawi bawk.

Chief Minister's Special Package pawh online-in dilna thehluh theih a ni a, common service centre (CSC) aṭang pawhin thehluh theih a ni. Hard copy-a thehlut tur tan DC office leh BDO office-ah thehluh theih tura ruahman a ni a; chhungkaw khat aṭangin mi pakhat aia tamin an dil loh nan ruahmanna siam a ni.

BANA KAIH (LOAN) THAWH HNIHNA

☑ Dilna portal thar kalpui a nih dawn avang leh dilna form a danglam deuh dawn avangin thawh khatnaa dil tawh, dil nawn leh duhte pawhin a thara dil vek tur.

☑ September 20, 2025 aṭangin dilna hi thehluh ṭan theih beisei.

☑ Loan dil tur trade azirin dilna form hrang chi nga siam a ni dawn.

☑ MKVIB chu line department pakhat anga kaltir ve tawh tur a ni.

☑ Dilna nghah khawl a ni tawh dawn lo a, a lut hmasa apiang endik nghal zel a ni tawh ang.

☑ Endik (monitoring) dan kalphung siamṭhat a ni a, awareness campaign zau taka kalpui tur a ni.