Sorkarin sem policy aiin, mahnia ding thei tura thiamthil inzirtir a ngai pawimawh - Prof. Lalnilawma

Minister of state Prof. Lalnilawma chuan, ei leh in emaw, pawisa emaw inpek aiin, mamawh thawk chhuak thei tura thiamna inzirtir a tlo zawk thu leh, Mizoram sorkarin sem policy aiin, mahni kutkea ding thei tura thiamthil inzirtir a ngai pawimawh zawk thu a sawi.

Prof. Lalnilawma hian August 22, 2025 khan a bial chhunga Mizoram Food Processing Research & Training Centre (MFPRTC) Incubation Centre, Seling Phaibawkah ei leh in sawngbawl inzirtirna khârna a hmanpui. "Mizoram sorkarin sem policy aiin mahni kutkea ding thei tura thiam inzirtir hi a ngai pawimawh zawk. Sum leh pai emaw, ei leh in emaw inpe dawn ila kan inpe sêng dawn lo a, mahni kea ding thei tura thiamna inzirtir hi a tlo zawk a, ei a tling zawk a ni," a ti.

Mizorama thar thlai leh theite chu sawngbawl ṭhat a pawimawh thu sawiin Lalnilawma chuan, "Kan sawngbawl loh chuan a chhe mai zel a, ṭha taka sawngbawl tur chuan thiamna neih a ngai," a ti a; Mizorama thei leh thlai tharte kut hnathawktute'n man man zawka an hralh theih nan Mizoramah ngei sawngbawl theih a ngaih thu a sawi.

MFPRTC Incubation Centre, Phaibawkah hian mi 20-in chawlhkar khat chhung pickle, jam, powder, chips, juice, thlai/thei vawnṭhat leh ei leh in himna chungchang inzirtir a ni a, training chhuakte hnenah Minister hian certificate a hlan a ni.