Hmeichhe naupang himna chungchang sawiho

Gauhati High Court-a The Juvenile Justice Committee chuan August 23, Inrinni khan Gauhati High Court, Aizawl Bench conference hall-ah hmeichhe naupang himna chungchanga inrâwnkhawmna an buatsaih a; Social Welfare, Women & Child Development minister Lalrinpuii leh Gauhati High Court judge Justice Michael Zothankhuma ten an hmanpui.

Lalrinpuii chuan, "Mizoram hi ziak leh chhiar thiam tamna lamah India ramah kan sang a, kan vengva bawk a, hengte vang pawh hian hmeichhe naupangte humhim kawngah India ram hmun dang aiin kan tiṭha zawk ni hian a hriat. Mizo khawtlangah hmeichhiate kan zalenin kan vannei em em a ni," a ti a; chutih rualin, hmasawn zel a ṭul thu a sawi.

Hmeichhe naupangte an in chhungkhur bakah, zirna leh khawtlangah thlamuang taka an awm theih nan vênpui reng a ṭul thu sawiin Minister chuan, "Sorkar hmalakna bik tur ni loin kohhran, khawtlang leh tlawmngai pawl hrang hrangte bakah, zirtirtute nen thawhhona ṭha tak neih chhunzawm zel a pawimawh," a ti.

Justice Michael Zothan-khuma chuan, "India ramin dan chi hrang hrang hmangin hmeichhe naupangte chanvo leh humhimna a siam a, kan zawm ṭhat a pawimawh. Mizoramah a vawi khatna atana inrâwnkhawmna buatsaih a ni hi hmasawnna pawimawh tak a ni," a ti a; inrawnkhawmna chuan awmze nei zawkin hmeichhe naupangte humhim kawngah hmasawnna a thlen a beisei thu a sawi.

Inrawnkhawmnaah hian thupui chu 'Multi-Stakeholders Consultation on Safeguarding The Girl Child: Towards a Safer and Enabling Environment for Her in India' tih a ni. Women & Child Development department, Health & Family Welfare department, School Education department, Rural Development & Administration department leh Mizoram State Commission for Protection of Child Rights hotute'n thupui hmangin presentation an nei a ni.