Mizoram pumpuiah 5G internet service kalpui tum a ni - ICT Minister

Information & Communication Technology (ITC) minister Dr Vanlalthlana chuan, Mizoram pumah 5G internet service kalpui tum a nih thu leh, hrui (fibre) thlen harsatna hmunah satellite kaltlanga internet pek vek tum a nih thu a sawi.

ICT Minister hi August 22, 2025 khan Taj Cidade De Goa-a 18th Edition of Digital Transformation Conclave-ah khualzahawm a ni a, ICT secretary Amit Sharma-a'n a ṭawiawm. Minister hian sorkar laipui hnuaia thawk te, corporate leh company hrang hrang aiawhte a kâwm a, Mizoram sorkar nena e-Governance kaihhnawiha thawhho theih dan turte a sawipui a ni.

Dr Vanlalthlana chuan, Digital India Mission-in kawng hrang hranga hmasawnna a thlen thu leh digital technology-te'n ram chhung hmun tin thlen thu a sawi a, "Mizoramah pawh digital movement-in nasa takin hma a sawn a, harsatna hrang hrangte paltlangin ṭangkai takin mipui rawngbawl hna a thawh mek a ni," a ti.

Mizoramah digital infrastructure tihchangtlun mek zel a nih thu sawiin Minister chuan, "Mizo Fiber Grid Network project, BharatNet Phase-III project hnuaiah internet chak zawk buaipui niin, 4G saturation project hmanga 4G tihchak leh Mizoram puma 5G service kalpui turin ruahman a ni," a ti a; fibre pawh luh harsatna hmunah satellite kaltlangin internet pek vek tuma ṭan lak a nih thu a sawi.

Dr Vanlalthlana chuan, e-Governance state ni turin Mizoramin ṭan a lak thu sawiin, "Secretariat pumpui e-office-ah siam a ni a, Chief Minister leh cabinet minister-te tiamin hmangtu 700 an awm mek. e-RAM, online OPD, deaths & births registration, MPSC online platform, Vantlang Viltu (Citizen's Eye App), online bill payment, KAI App, leak apps leh Mipui Aw te ṭangkai taka hman mek a ni," a ti.

ICT Minister chuan, inbiakpawhna ṭha pek chu hmasawnna tluantling leh huapzo nei tura lungphûm pawimawh a nih thu sawiin, "Mizoram chuan industry 4.0 hmanrua hmang turin hma a la a, microsoft nena ṭang dunin ṭhalaite artificial intelligence chungchang zirtirna kalpui tum a ni. Bhasini hnuaiah Mizo leh tualṭo ṭawng dangte digital platform-ah dah chhoh mek zel a ni a, Mizoram Startup Mission hmangin digital enterpreneur chawi lar a ni," a ti a; Mizoram sorkarin Digital India siam tura hmalakna a thlawp thu a sawi.

18th Digital Transformation Conclave-ah hian thupui chu 'Digital India to Viksit Bharat: Transforming Governance with AI & Emerging Tech' tih a ni a; mipui nawlpuiin digital technology chhawr ṭangkaia hma an sawn theih dan tur chungchang sorkar, IT company leh academia-te'n sawihoin, thawhho dan turte an ngaihtuah a ni.