KHAWTHLIR
Inven dan inzirtir
Ṭhuampui Branch YMA leh Shalom Society chuan August 22, 2025 khan Ṭhuampui venga sikul hrang hrang zirlai 480-te pualin ruihhlo leh mipat hmeichhiatna hmansual laka inven dan tur inzirtirna an buatsaih. Inzirtirna hi Ṭhuampui YMA Kumpuan chairman Lalremruata'n a kaihruai a, bialtu AMC coporator Vanlalneia'n a hmanpui. Shalom Society-a thawktute'n zirlaite chu thil pawimawh an zirtir a ni.
Naupang inkhawmpui
Evangelical Free Church of India (EFCI), Mizoram Region chhunga presbytery hrang hrangah August 22, Zirtawpni aṭanga nimin thleng khan bial naupang inkhawmpui hman a ni. Inkhawmpuiah hian Pathian thu leh hla hmangin naupangte an intihsiak a ni.
Maubawk vengin awm phal tawh lo
Maubawk Local Council, YMA, MHIP leh MUP chuan thuchhuah inṭâwm siamin, an veng mi Runliani (80) thattua puh Vanlalmuanchhana (21) s/o Zairemmawii, Maubawk man a ni chu lawmawm an tih thu leh a phu tâwka na taka hrem an phût thu an tarlang. "Tualthattu hi man chhuah a nih aṭang hian Maubawk veng chhungah a awm zui kan remti tawh lo a ni," an ti.
AR-in buatsaih
Assam Rifles chuan August 23, Inrinni khan Lawngtlai district-a Parva-I khuaah hmeichhe naupang himna chungchang inzirtirna an buatsaih. He hunah hian tualchhung mi naupangte leh nu leh pate an tel a; hmeichhia naupang dikna chanvote leh an himna atana pawimawhte an zirtir a ni. Assam Rifles hian August 22 pawh khan Siaha district-a Laki High School-ah hliam inenkawlna hmasa (first aid) hman dan zirna an buatsaih a, zirlai 45 an tel a ni.
GAC luang chhuak
Aizawl College chuan an kum 50-na an lawmna kal mekah August 23, Inrinni zing khan Mualpui kâwnah luanchhuah hun an hmang. He hunah hian GAC zirlai, zirtirtu leh lo zir tawh ṭhin bakah, thawk tawh ṭhinte’n a mamawhte tana hman theih tur in chhung bungbêl, thawmhnaw leh thil dang chi hrang hrang an thawh khawmte chu a thlawna lak theih turin an chhawp chhuak a ni.
Hleilenna thleng duh lohna lantir
Maubawk venga Seventhday Adventist kohhrana Women's Ministries chuan August 23, Inrinni chawhnu khan Maubawk kâwnah mual inkhawm an nei a, upate chunga hleilenna thleng ṭhin duh lohna an lantir nghal. He hunah hian Seventhday Adventist kohhrana hmeichhia eng emaw zat an tel a ni.