Speaker & Dy Speaker inkhawmpuiah tel

August 24-25, 2025 chhung khan New Delhi-a Delhi Legislative Assembly-ah All India Speakers' Conference neih a ni a; Mizoram Legislative Assembly speaker Lalbiak-zama leh deputy speaker Lalfamkima te an tel.

Lalbiakzama chuan, Vithalbhai Patel ropuina leh ram tan a inpekna thûkzia sawiin, state ṭhenkhatte'n Assembly-a bill an pass-te governor ṭhenkhatin politics thil vanga an pawmpui (assent) mai ṭhin lo chu a vei thu a sawi a, "India democracy ropuina kan sawi rual hian, democracy hi beihin a awm em ni tih hi kan inzawh tlan a ṭul a, democracy hi kan humhalh tlat a pawimawh a ni," a ti.

Conference-ah hian India rama state tin legislative assembly speaker leh deputy speaker-te bakah, Union Home minister Amit Shah, Parliamentary Affairs minister of state Kiren Rijiju, Delhi chief minister Rekha Gupta leh sorkar laipui hotute an tel. Thupui chu ‘Commemoration of Centenary of Veer Vithalbhai Patel’ tih a ni a, India mi Central Legislative Assembly President/Speaker atana thlan (elected) hmasa ber kum 100 tlin lawmna hun hman a ni.