MIFCO-in sapthei quintal 154.59 leh lakhuihthei qtl 153.37 an sâwr tawh

Mizoram Food & Allied Industries Corporation (MIFCO) chairman Lalṭhazuala Rawite chuan, ZPM sorkar hnuah Chhingchhipa MIFCO hmunah sapthei quintal 154.59 leh lakhuihthei qtl 153.37 sâwr a nih tawh thu a sawi.

Lalṭhazuala Rawite hian nimina ZPM inkhawmah thu sawiin, "MIFCO hi a dintute din chhan ang ngeiin hlawhtlinpui kan tum a, sorkar kal tawhte'n a hming maiin kalpui mah se, kut hnathawktute hmangaihtu kalphung thar sorkar hnuaiah chak takin hmalakna kan kalpui mek a ni," a ti.

MIFCO Chairman sawi danin, MIFCO hmunhma tuaithar nan state sorkar chuan Bána Kaih (Handholding) policy hmangin cheng nuai 24 a pe a, tuaithar mek zel a ni. Sapthei qtl 154.59 leh lakhuihthei qtl 153.37 an sâwr tawh aṭangin Rs 81,5000 an hlêp tawh.

Food, Civil Supplies & Consumer Affairs department-in MIFCO tan supply tur a ngaihtuahsak a, chumi aṭanga hlêp an hmuh chu cheng nuai 70 chuang a tling tawh a, hlêp aṭangin kut hnathawktute hnen aṭangin sapthei leh lakhuihthei an lei ṭhin.

MIFCO Chairman chuan, MIFCO chu kum 1989-a din a nih thu a sawi a, "Hetiang din nachang an lo hria hi an fakawm a; mahse, a taka kalpui a ni lo erawh kan ui em em a, kum 30 chuang heti ringawta kalpui a ni hi a lainatawm tak zet a ni," a ti a; MIFCO ṭha taka enkawl a ni lo ṭhin chu pawi a tih thu a sawi.

Sorkar kal tawhte'n Vairengtea MIFCO-in baibing leh rawtuai a sawngbawlna tur hmun Home department hnena an hlan tawh chu MIFCO hnenah hlan let a nih thu sawiin Lalṭhazuala chuan, "Chumi atan chuan cheng nuai 71 chuang kan dawng," a ti. Bung Banglaa MIFCO sa talhna hmunah vawk leh bawng sawngbawlna kalpui ṭan mek a nih thu leh, Sairangah mineral water siamna tur khawl an bun tawh thu a sawi bawk.