Ruihhlo ngaite enkawlna Hulhliap Short Stay Centre thawh 3-na ṭan

Hulhliap - Short Stay Centre thawh (batch) thumna chu nimin khan Synod Revival Camping Centre, Sihphir Neihbawihah ṭan a ni a, mi 173 an lut.

Mizoram sorkar, Mizoram Synod leh tlawmngai pawl ṭanghote'n an buatsaih Hulhliap SSC-a lut turte chu Central YMA Office leh Bawngkawn YMA Hall-ah an innghak khawm a, sorkarin a ruahman bus hmangin Synod Revival Camping Centre-ah hruai an ni. Hulhliap Core Committee leh Task Group member-te'n an buaipui.

Hulhliap SCC batch thumnaah hi ruihhlo ngai, khawlaia riak ṭhinte pual deuha tih a ni a, Aizawl veng hrang hranga khawlaia teirawlaite hruai khawm an ni.

Hulhliap - Short Stay Centre-ah hian tir lam ni 10 chhung chu ruihhlo nghei vanga harsatna an tawh loh nan damdawi nen enkawl an ni dawn a, chumi zawh ni nga chhung chu rilru lama mithiamte'n an enkawl ang. A tawp lam ni nga chhungin Pathian thua enkawl an ni leh ang a, Synod Revival speaker Lalhriatkima leh a team Holy Fire Team-in gospel camping an neihpui dawn a ni.