CM's Rubber Missions sawiho

Chief minister Lalduhoma kaihhruaiin nimin khan CMO conference hall-ah Chief Minister's Rubber Missions chungchang sawiho a ni. CM Rubber Missions thawh hnihnaah Handholding aṭangin chhungkaw 1,373 leh NABARD aṭangin chhungkaw 1,200-te nen thawhho a nih dawn thu an tarlang.

Ṭhutkhawmah hian CM Rubber Missions thawh hnihna kalpui dan tur tlangpui sawi a ni a; ram hectare khata zaua chhungkaw pakhat tana ṭhelrêt kung 450 vel phun chu a beitham deuh dawna a lan avangin hectare hniha zau thlenga an tihzauh theih tur ram pek dan awm thei se, an ti. Ṭanpuina chu hectare khat atan pek phawt a, a ṭul anga a kum leh lamah pek belh dan dap ṭhin an rel.

Ṭhelrêt ṭiak ṭha chauh loneitute'n an dawn theih nana hmalak dan tur sawiho a ni a; ṭhelret chíngtu turte'n a chi ṭha, chìn tlak nia an hriat chauh an lei theih dan ruahman an rel. Progress partner thlan dan tur an sawiho nghal bawk.

Tarlan danin, CM's Rubber Mission hi NABARD fund leh Handholding sum hmangin kalpui mek a ni a; a thawh hnihna atan inbuatsaih chhoh mek niin, thawh hnihnaah hian Handholding aṭangin chhungkaw 1,373 leh NABARD aṭangin chhungkaw 1,200-te nen thawhho tur a ni.

Ṭhutkhawmah hian Land Resources, Soil & Water Conservation minister Lalthansanga leh department official te, Mizoram Rubber Society hotute an tel.