Ruihhlo Do Beihpui atan inbuatsaih; Ramri hnaih khuate tlawh kual mek

Mizoram sorkarin Ruihhlo Do Beihpui (Special Drive on Drugs) a thlak turah Home department hotute leh Central YMA hruaitute chuan tunlai hian Myanmar ramri hnaiha Mizorama ruihhlo luhna kâi khàn awmna khuate an tlawh mek.

Home department leh CYMA aiawhte hian nimin zing khan Tlangsam, Zote, Ngur leh Ngur Vengsang te an tlawh a, tlai lamah Bulfek khua an tlawh. Heng khua/veng an tlawhnaah hian khawtlang hruaitute nen an inkawm a ni.

Police hotute leh CYMA hruaitute hian vawiinah Hnahlan, N Diltlang, Khuangphah leh Vaikhawtlang khuate an tlawh dawn a; chumi hnuah Sesih, Lianpui, Leisenzo, Vangchhia, Vaphai, Saikhumphai leh Farkawn khuate an tlawh leh ang.

Ramri hnaih khuate tlawhnaah hian Mizoram Police aṭangin IGP H Ramthlengliana a kal a, Champhai additional SP Victor Zothansanga'n a ṭawiawm. CYMA aṭangin assistant secretary Fabian Lalfakawma, treasurer Roneihthanga leh finance secretary MS Ralte te bakah, CEC member pathum an tel a, Champhai Sub-Hqrs hruaitute'n an ṭawiawm bawk.

Mizoram sorkar ruahman dan chuan, Myanmar ramri hrûl khaw tinah police dahin, September 2025 aṭangin Myanmar aṭanga ruihhlo lo lut tur dan beihpui thlak a ni dawn a ni.