Health worker 31 tun hnaia dah nghehte chungchang Health Minister-in a sawifiah

Health & Family Welfare minister Lalrinpuii chuan, 'The Government of Mizoram Regularization of Centrally Sponsored Scheme (CSS) Employees Scheme, 2024' hmanga tun hnaia health worker 31 dah nghehte chu Ministry of Health & Family Welfare hnuaia centrally sponsored plan scheme hnuaia lak an nih thu leh, dan ang thlapa lak leh dah ngheh an nih thu a sawi.

Minister Lalrinpuii hian nimin khan health worker mi 31 dah ngheh chungchang sawifiahna a tichhuak a; Health department-in CSS a kalpui zinga Implementation of Family Welfare Programme hnuaia Infrastructure Maintenance (sub-centre) hmangin kum 2013-ah sorkarah health worker 50 lak phalna dil a nih thu a tarlang a, "MR skill-II 50 lak phalna pek a ni a, engagement card-ah ‘co-terminus with the scheme’ ziah lan kher tur tih a ni," a ti.

MR skill-II lak zingah báng tawh leh thi tawh an awm avangin mi 32 an la thawh mek thu tarlangin Minister chuan, "Scheme borne an nih avangin PE Regularization Scheme 2020 hmanga dah ngheh theih an ni lo. Kum 2024 khan sorkarin CSS hnuaia thawkte dah nghehna tur The Government of Mizoram Regularization of CSS Employees Scheme, 2024 a siam. Dan ang thlapa CSS Regularization Scheme, 2024 hnuaia regularise theih health worker 31 lai kan nei hi department chuan lawmawm a ti hle," a ti. Mi 32 zinga pakhatin check-list document a neih kim loh avangin dah ngheh a nih ve loh thu a tarlang.

Lalrinpuii chuan, "Health worker 31-te hnena an chanvo dik tak (regularization) a pek hian sorkar chuan mipui leh a hnathawkte lakah a tih tur dik tak a ti a ni," a ti bawk.

Hetih lai hian, All Mizoram CSS Employees Coordination Committee (AMCECC) chuan, Mizoram sorkarin CSS Regularization Scheme 2024 hmanga provisional employee mi 31 a dah nghet chu thil dik nia an hriat loh avangin an lungawi lo a, August 29, 2025 hmaa order sût turin sorkar an phût a; an beisei anga hmalakna a awm loh chuan an kal zel dan tur an rêl dawn.

CSS Regularization Scheme 2024 chu CSS hnuaia thawkte tana duan a nih thu sawiin AMCECC chuan, "Vawiin thlenga a scheme neitu CSS hnuaia thawkte dah ngheh kan la nih loh laia provisional employee-te hmantir a ni ngawt mai hi thil dik niin kan hre lo," an ti.

HEALTH MINISTER TARLAN ṬHENKHAT

☑ CSS Regularization Scheme, 2024-in eligibility criteria a sawi leh, DPAR-in check list a siamte zawm leh nei famkim vek an nih avangin Infrastructure Maintenance Scheme hnuaia health worker-te hi dah ngheh (regularised) an nih theih nan sorkarah thlen a ni.

☑ MR/PE 31-te regularization proposal chu DPAR (ARW)-in ngun taka an lo endik hnuah approval a pe a, Finance department pawhin approval a pe.

☑ July 15, 2025-a Departmental Promotion Committee (DPC) ṭhukhawmin mi 31-te hi sorkar hnathawk nghet turin a recommend.

☑ Fimkhur thu-ah Implementation of Health & Family Welfare Programme Scheme atana central sum hmuh hi CSS-a chhiar tur a nih leh nih loh Finance department-ah zawh a ni a; Finance department chuan 'The scheme for Implementation of Family Welfare Programme is confirmed as a CSS tiin a nemnghet.

☑ Law & Judicial department thurâwn lak a ni a, '... there is no legal infirmity in the regularization process and the department is advised to proceed with the decision of the DPC' a ti.