Rêl kawng zangnadawmna chingfel turin CM-in a ngen

Chief minister Lalduhoma chuan August 23, 2025 khan a chenna banglaah Railway Board chairman Satish Kumar a kâwm a; Bairabi-Sairang rel kawng kaihhnawiha zangnadawmna la chinfel lohte a rang lama chingfel turin a ngen.

CM Lalduhoma chuan, rel kawng siamna kaihhnawiha thil la chinfel lohte sawiin, Railways lamin national highway aṭanga rêl kawng panna kawng (approach road) an laihna leivûngin NH kawngpui sira tuihâwk luankawr (side drain) a vûr vanga harsatna leh zangnadawmna la chinfel loh chungchang a sawi.

Chief Minister hian leivûngin a vûr tuihâwk luankawrte chu siam ṭha a, concrete slab-a khuh tura hrilh a; zangnadawmna la chinfel lohte chu a rang lama chingfel turin a ngen bawk. Satish Kumar chuan, Chief Minister thil sawite chu a bawhzui tur thu CM a hrilh.

Inkawmnaah hian September 13, 2025-a Bairabi-Sairang rel kawng hawng tura Prime Minister lo zin tur atana inbuatsaihnate an sawi dun bawk.