KHAWTHLIR

CM leh AR hotu

Chief minister Lalduhoma chu nimin khan a pisaah Assam Rifles inspector general (East) Maj. Gen. Suresh Bhambu-a'n a hmu a, an inkâwm. Inkawmnaah hian Mizo Territorial Army lak tura an thlen chin te, Zokhawsang Assam Rifles ram chungchang te, ruihhlo dap beihpui an thlak mekna chanchin te, Bairabi-Sairang rel kawng leh a hawng tura Prime Minister lo kal tur chungchangte an sawi dun a ni.

Chhawp hnawk khap

Aizawl district magistrate Lalhriatpuia chuan, Aizawl district-a kawngpui sir khawi hmunah pawh iron rod, balu, rawra, leirawhchan, lung leh in sakna bungrua dangte daha chhawp hnawk khap a nih thu a tarlang. Thupek zâwm lote chu dan hmanga hrem theih an nih thu a tarlang bawk.

Kawng khâr dawn

Aizawl Traffic SP Ruatsanga Ralte chuan hriattirna chhuahin, Bethlehem Veng LC-in Bethlehem Veng culvert bul aṭanga Venghlui panna tawntir thleng kawng an siam dawn avangin, he kawng hi vawiin aṭanga September 9, 2025 thleng khar a nih dawn thu a tarlang.

Lawmthu sawi

National Trade Union of Mizoram (NTUM) chuan thuchhuah siamin, Chief Minister thurâwn anga PWD, PHE leh PE department-a muster roll (MR)-te provisional employee (PE)-a dah an nih ve theih nan department pathum minister ṭheuhte an hmuh thu an tarlang. NTUM chuan, "Proposal siam tura kan ngen angin September 2025 chhunga proposal siam tura hma min laksak avangin lawmthu kan sawi a, a hlawhtlin ngei theih nan beiseina sang tak nen kan thlir reng dawn a ni," an ti.

Cheng nuai 50 chawitir phût

Centre for Environment & Social Justice (CESJ) chuan MINECO chhung kawngpui kama hnim tihfai nan hlo tûr hman a nih thu an tarlang. Hemi chungchangah hian CESJ hruaitute'n nimin khan Mizoram Pollution Control Board-ah complaint an thehlut a, hlo túr hmangtute hrem an nih theih nan hma la tura ngenin, Rs 50,00,000 chawitir an phut thu an tarlang a ni.