Constable lâk tharte hi khirh leh fimkhur taka lak an ni - HM

Mizoram Police-in tun hnaia constable an lak tharte chuan nimin aṭang khan Police Training School (PTS), Thenzawlah training an ṭan a, training ṭanna hun hmanpuitu Home minister K Sapdanga chuan, constable lak tharte chu khirh leh fimkhur taka lak an nih thu a sawi.

Tun ṭuma Constable Basic Training hi batch 70-na a ni a, an vaiin constable 277 an lut. Training ṭan hun (starting date) chu September 1, 2025 a ni dawn a, training ṭan hma chawlh kar khat chu Zero Week tia vuahin, constable tharte luh hun leh an tlangnelna hun atan hman a ni ang.

Home Minister chuan, tun ṭuma police constable lak tharte chu khirh tak leh fimkhur taka lak an ni a, thlan satliah an ni lo tih sawiin, "Vawiinah hian Mizoram Police-in bung thar kan kai a ni," a ti a; training chhungin an rilru leh theihna zawng zawng hlan tur leh mipui thlamuanpui tham police zahawm nih tum turin a chah. Police uniform hlutzia leh zahawmzia hre tura fuihin, "Uniform hâkin a entir - discipline a taka lan chhuahtir ngei tum ang che u," a ti.

Excise & Narcotics, YMA leh Police-te ṭanghoin ruihhlo leh ngawlvei do beihpui thlak an tum thu sawiin K Sapdanga chuan, "Drugs tawlhrute mai bakah ngawlveite hian rûkrûk leh pawi dang an khawih ṭhin avangin nun an tirálṭî a ni," a ti a; ruihhlo do a ngaih thu a sawi.

Home Minister chuan, minister a nih hnuah kuhva tawlhruk nasa lehzuala do a nih thu a sawi a, "Checkgate-a a pâwnga puia pawisa khawn tihtawp a ni a, police inenkawlna kawngah hmasawnna hmel kawng hrang hrangin hmuh a ni," a ti.

Home Minister ṭawiawmtu minister of state B Lalchhanzova pawhin thu sawiin, "Eng vanga he hmuna lo kal nge, eng ti tura PTS-a awm nge in nih tih in thinlung luah rengtu leh in awm chhunga in nun kaihruaitu ni se ka duh," tiin constable tharte a fuih a ni.

B Lalchhanzova chuan, thuawihna nun nei tur leh tuarhchhel tura chahin, "Khawvel hi mi pangchangte hrehawmna, mi tuarchhelte nuam tihna hmun a ni," a ti a, mi dangte puih beisei lo a, mi dangte ṭanpuitu nih tum zawk turin a chah.

DGP Sharad Agarwal chuan, tun hnaia police lak chu Mizorama kum 10 chhunga a ruala police lak tam ber ṭum a nih thu sawiin, "Kum 30 aṭanga 35 chhung vel chu police chhungkuaa telin, police hi an nihna a ni tawh dawn," a ti a; ṭhahnemngai taka tih turte ti a, Mizoram Police thil tum a taka nun chhuahpui turin police ṭang tharte a fuih.

Police lak tharte puala training-ah hian chawlhkar 45 chhung indoor leh outdoor training ngawrh taka kalpui ni dawn a, July 2026-ah zo tura beisei a ni a, an zingah An zingah hmeichhia 26 an tel. Training course uluk taka duan a ni a, mahni invawng thei mi, mi ṭha, khawtlang leh ram tana mi hlu chher chhuah chu a tum ber a ni.

POLICE CONSTABLE THAR
No. District Police
1. Aizawl - 138
2. Lunglei - 24
3. Siaha - 4
4. Champhai - 23
5. Kolasib - 19
6. Serchhip - 21
7. Lawngtlai - 3
8. Mamit - 12
9. Saitual - 12
10. Khawzawl - 5
11. Hnahthial - 6