Vawiinah Assembly session ṭan dawn

Mizoram State Legislative Assembly pakuana ṭhutkhawm vawi ngana chu vawiin chawhma dar 10:30 hian ṭan a ni dawn a, naktukah chhunzawma zawh a ni ang. Tun ṭumah hian bill pali a lut a, chu'ng zingah chuan kutdawh khapna tura ruahman 'The Mizoram Prohibition of Beggary Bill' a tel.

Assembly session ṭan ni, vawiin hian session hmasa leh tun session inkara thi, Parliament leh state assembly-a member lo ni tawh - Rajya Sabha MP Ronald Sapa Tlau leh Dampa bialtu MLA Lalrintluanga Sailo te sûnna hun hman a ni dawn a; sûnna hun hman zawhah zawhna leh chhanna hun hman a ni ang a, sorkar bill-te sawiho a ni ang.

Session ṭhutkhawm vawi ngana atan hian sorkar bill pali, official resolution pakhat leh paper pharh (lay) tur pariat a awm a; zawhna - house chhunga chhàn chi (starred question) 350 leh ziaka chhàn chi (unstarred question) 124 a lut.

Ni hnih chhung hian sorkar bill pali put luhte pawm tum a ni dawn a; chu'ngte chu - The Mizoram Land Revenue Amendment Bill, The Mizoram Local Body Ombudsman Bill, The Mizoram Prohibition of Beggary Bill leh The Mizoram Private Agencies Amendment Bill a ni a, The Mizoram Local Body Ombudsman Bill leh The Mizoram Prohibition of Beggary Bill hi bill thar a ni.

Official resolution, Mizorama 'Water (Pre-vention and Control of Pollution) Amendment Act, 2024' hman a nih ve theihna tura rawtna a lut bawk.