BSNL-in tower tam zawk phun belh tum

Bharat Sanchar Nigam Limited chuan, Mizoram hmun kilkhawr zawka zirlaite leh hna zawngte'n online exam dawna Aizawl leh district khawpui an pan ṭhin tihziaawm nan BSNL Exchange ṭhinte chu Online Exam cum Skill Training Centre-a thlak an remti a; hmun kilkhawr zawkah internet a ṭhat theih nan tower eng emaw zat phun belh an tum.

Chief minister Lalduhoma chu nimin khan a pisaah Mizorama lo zin mek BSNL (NE-1 Telecom Circle) chief general manager Daily Giri nen an inkâwm a; Mizoram tan phone tower tam zawk leh online exam centre tam zawk awm theihna tur leh India ram khawpui ṭhenkhata Mizoram House sak dan turte an sawi dun.

Sorkar thuchhuah tarlan danin, internet ṭhat tâwk loh vanga Mizoram hmun kilkhawr zawka zirlai leh hna zawngte'n online exam an hmachhawn dawna Aizawl leh district khawpui an pan ṭhin tihziaawm nan tun hmaa BSNL Exchange ṭhinte chu Online Exam cum Skill Training Centre-a thlak BSNL hotute'n an remti a ni.

BSNL chuan Mizoram hmun kilkhawr zawkte'n internet signal ṭha an neih theih nan tower eng emaw zat dah belh an tum a, Mizoram tan tower 53 phun belh tur an nei mek. Sorkar ngaih pawimawh hmasak hmunahte tower phun phawt tur a ni a, a ṭul angin tower dil belh zel theih a ni.

CM leh BSNL CGM-te hian India ram khawpui ṭhenkhata BSNL rama Mizoram House emaw, hostel emawte neitu nihna inṭâwm (partnership pattern) hmanga din chungchang an sawi dûn a; kalpui dan tur chu General Administration Department (GAD)-in lo duang dawn a, BSNL nena inbe zel chunga kalpui a ni ang.

Mizorama rél kawng leh rél chawlhhmun tharte tana mobile signal ṭha pek chungchangah Daily Giri chuan, hma an lak mek thu Chief Minister a hrilh.

Chief Minister hi GAD secretary Sudir Kumar, SIDCO managing director LP Lalchangkima leh OSD to CM R Lalrodingi ten an ṭawiawm a ni.