Septic tank tui lâk khawmna tur siam mek PHE Minister-in a enfiah

Public Health Engineering minister Prof. Lalnilawma chuan August 25, Thawhṭanni zan khan AMRUT 2.0 hnuaia tuidâwt hmanga septic tank aṭanga chhuak tui lak khawmna tur hnathawh a enfiah.

Tuidâwt hmanga septic tank aṭanga chhuak tui lak khawmna tur siam hian Aizawl tlâk lama veng pakua - Khatla, Tuikual South, Tuikual North, Dawrpui, Dawrpui Vengthar, Dinthar, Vaivakawn, Kanan Veng leh Chawnpui a huam dawn.

Veng pakua aṭang hian lei chhungah tuidâwt hmangin septic tank aṭanga chhuak tui lak khawm a, MINECO mawnga a sâwngbâwlna hmunpuiah luan khawmtir a ni dawn a; êk paih duh tan pawh lirthei hmangin a sawngbawlna hmunpuiah paih theih a ni bawk ang.

PHE Minister hian Bazar Bungkawn leh Dinthar inkar kea fangin, tuidâwt hmanga septic tank aṭanga chhuak tui lak khawmna tur hna thawh mekte a tlawh a; PHE department-a hotute'n an ṭawiawm.

Prof. Lalnilawma chuan, AMRUT hmalaknaa hna thawh mek chu hna thawhna veng mipui dawhtheihna leh puihna tel lo chuan a hlawhtling thei dawn lo tih a sawi a, "Neitu nihna nen he hmasawnna hna hi lo dawngsawng turin kan inngen a ni," a ti.

Aizawlah septic tank tui luan fîmna tur nei ṭha lo leh nei lo an tam avangin septic tank pût leh paih ruah ngai a tam thu sawiin PHE Minister chuan, "Hmun remchang leh him, sawngbawl thianghlimna hmun kan mamawhna a sang hle. He project hi hriselna leh faina kawnga hmasawna min thlen thei tur a ni," a ti a, hna thawh zawh thuai a nghahhlelhawm thu a sawi.