Minister-in theihtawp chhuah turin fuih

Public Health Engi­neering (PHE) minister Prof.Lalnilawma chuan PHE department-a thawkte chu inthlahdah thei an nih loh thu leh mipui harsatna sukiang turin theihtawp an chhuah a ṭul thu a hrilh.

PHE Minister hian nimin khan video confe­rencing kaltlangin Mizoram hmun hrang hranga PHE department hotute leh engineer-te a kâwm a ni.

Prof. Lalnilawma chuan, PHE department chu mipui hnena tui thianghlim pe ṭhintu a nih angin an hna chu a pawi­mawh thu leh in­thlah­daha induh thei an nih loh thu a sawi a, "Mipui mamawh zawng zawng pe thei lo mah ila, mipui harsatna sukiang turin theihtawp kan chhuah a ngai. Mipui tana ding kan ni a, mipuiin an mamawh leh harsatnate an rawn thlenin ṭha takin kan lo dawnsawn ṭhin a pawimawh," a ti.

PHE department-in harsatna an tawh vanga tui supply mumal pek theih loh châng a awm ṭhin thu sawiin Minister chuan, "Kan harsatna tawhte hi mipui hriat turin kan puanzar ṭhin a pawimawh. Khaw hrang hrang, hmun hrang hranga kan harsatna tawhte hi a rang lama hotute hnenah thlen a, a sutkian dan turte ngaihtuah ran ṭhin a ṭul," a ti a; PHE department-in hma an sawn theih nan theihtawp chhuah ṭheuh turin a chah a ni.