KHAWTHLIR

Thisen pe

Ebenezer Medical Center chuan nimin khan Civil Hospital, Aizawl tan thisen unit 108 an pe a, petute mipa 56 leh hmeichhia 52 an ni. Nimin vek khan MDM, Lunglei district-in Civil Hospital, Lunglei tan thisen unit 5 an pe bawk.

Serchhipah ruihhlo do dan tur sawiho

Serchhip district bawrhsap Paul L Khuma kaihhruaiin nimin khan District Committee on Nasha Mukt Bharat Abhiyan member-te'n ngawrh lehzuala ruihhlo donaa hmalak dan tur an sawiho. Hmalak dan tura rawtna nei tan September 5, 2025 thleng DC pisaah thehluh a, rawtna lutte hmanga hmalak dan tur (action plan) siam an rel a ni.

Dampa by-election atan inbuatsaih

Dampa Assembly Constituency-a MLA by-election neih tur atan nimin khan Mamit DC conference hall-ah inthlan kaihhnawih sector officer atana ruat mi pariatte pualin training buatsaih a ni a; election officer Lalnunfela Chawngthu-in sector officer mawhphurhna leh fimkhur ṭulnate a sawifiah. By-election neih turah hian sector officer mi pariatte enkawl tur polling station-te thliar tawh a ni.

MHIP an lawm

MHIP General Headquarters chuan thuchhuah siamin, August 19, 2025-a Runliani, Maubawk tualthih chungchangah police-te'n hma an la nghal leh tualthattua puh police-te'n rang taka an man chu lawmawm an tih thu an tarlang a, "Mizoram police-te kan thlamuanpuiin kan chhuang tak zet a ni," an ti.

LADC EM

Lai Autonomous District Council (LADC) executive member atana CEM N Zangura rawtna anga Governor-in a ruatte chu nimin khan rinawmna thu tiam tira lakluh an ni. LADC EM-te chu - Sanghuliana Mualchin, C Rongura, C Lalsawmzuala, Andrew Laltlanzara, Lalropuia Chinzah, L Danial-a, C Hrangṭhianga, HC Lalthawmliana leh H Lalmuansangate an ni.