Lawngtlai dist-a bank CD ratio 112.92%

Sorkar kum kal mek 2025-26 first quarter (April-June) chhungin Lawngtlai district-a bank hrang hrangte'n deposit hmuh aṭanga loan pek chhuah zat, credit deposit (CD) ratio chawhrual chu 112.92% a ni a, Lunglei district-a bank-te CD ratio chawhrual chu 69.95% a ni.

Lunglei District Consultative Committee (DCC), District Level Review Committee (DLRC) leh District Level Security Committee (DLSC) chu an chairman Navneet Mann, bawrhsap hoin nimin khan DC conference hall-ah an ṭhu a; April-June, 2025 chhunga Lunglei district-a bank branch 23-te hnathawh thlir letin, hmachhawp leh hmalak zui dan turte an sawiho.

Ṭhutkhawma tarlan danin, April-June, 2025 chhung khan Lunglei district-a bank branch 23-te CD ratio chawhrual chu 69.95% a ni a; KCC hnuaiah crop loan 707 atan cheng nuai 953.38 leh animal husbandary loan 345 atan cheng nuai 518.03 leh, MUDRA (PMMY) loan 441 atan cheng nuai 508.54 pek chhuah a ni.

PMJDY hnuaiah bank account 62,465 awmin, chung zinga 24.94% chu zero balance account a ni a; RuPay Card pek chhuah 42.19% zingah card nung 34.75% leh Aadhaar nena thlun zawm 64.88% a awm. July-September 2025 chhungin PMJDY leh Re-KYC atan beihpui thlak mek a ni bawk.

Navneet Mann chuan, loan rulh ṭhat loh (non performing assets) awmte chinfel thuai a nih theih nan bank-te chu theihtawp chhuah tur te, mipui hnena sum enkawl thiam zirtirna (financial literacy campaign) pawh a tam thei ang ber buatsaih tur leh, bank kaltlanga hamṭhatna scheme awmte mipui hnenah uar zawka puangzar turin a chah.

Lawngtlai DCC, DLRC leh DLSC chu additional DC David Lalrinawma kaihhruaiin DC conference hall-ah an ṭhu a; Lawngtlai district-a bank branch hrang hrangte hnathawh thlir letin, hmachhawpte an sawiho.

Lawngtlai district-ah hian April-June, 2025 chhungin bank hrang hrangte CD ratio chawhrual 112.92% a ni a, January-March, 2025-a an CD ratio 121.75% chu 8.83%-in an pha lo. Lawngtlai district-ah hian bank branch 12, ATM booth pariat, business correspondent 84, financial literacy centre pakhat leh Indian Postal Payment Bank pakhat a awm mek.

David Lalrinawma chuan, bank hotute chu anmahni dawrtu mipui dawngsawng thiam ṭhin turin a chah a, "A bik takin mipuite'n hamṭhatna an neih hrang hrang an hriat zung zung theih nan leh bank dawr kawngah harsatna an tawh loh nan financial literacy campaign ngai pawimawh thar a ṭul," a ti a; PMJDY, PMJJBY, PMSBY leh a dangte hnuaia loan pek chhuah tur target an neihte tihhlawhtling ngei turin a chah bawk.