Kuminah Lunglei dist-ah thubuai 141

Lunglei district-ah kumin chhungin dan bawhchhiatna kaihhnawih thubuai 141 ziah luh a ni tawh a, chu'ng zinga 108 chu chinfel a ni tawh. Ruihhlo kaihhnawih thubuai 36-ah mi 57 man an ni tawh bawk.

Lunglei District Court-a sorkar ukil (public prosecutor)-te leh Lunglei police-a hnu chhuitu, case investigating officer (case IO)-te pualin tun hnai khan Lunglei SP conference hall-ah India rama dan bawhchhiatna leh a hremna dan thar 'New Criminal Law' chungchang leh hnu chhuina (case investigation) kalpuinaa hriat tur leh zawm turte zirhona buatsaih a ni.

Zirhonaa Lunglei Police hotute tarlan danin, kuminah Lunglei district-ah dan bawhchhiatna kaihhnawih thubuai 141 ziah luh a ni tawh a, chung zinga 108 chu chinfel tawh niin, la chinfel loh 33 a awm.

Ruihhlo kaihhnawih (NDPS Act)-ah thubuai 14 ziah luh a ni a; heroin gram 1,733.44 man niin, Rs 52,08,780 hûa chhût a ni a, a kaihhnawihah mi 25 man an ni. MLP Act hnuaiah thubuai 22 ziah luh a ni a, zu litre 2,934 (Rs 30,79,400 hûa chhût) man niin, a kaihhnawihah mi 32 man an ni bawk.

Public prosecutor Malsawmdawngliana tarlan danin, Lunglei District Court-ah hian sorkar ukil pariat an thawk mek a; thubuai 613 an khawih zinga 444 chinfel tawh tawh niin, chu'ng zinga 410-ah sorkar ukilte an chak a, thubuai 34-ah an chak lo thung.