District pali-ah Red Ribbon Quiz buatsaih

Mizoram State AIDS Control Society (MSACS) bultumin nimin khan Aizawl, Lunglei, Saitual leh Hnahthialahte sikul naupangte pualin district level Red Ribbon Quiz Competition buatsaih hmawrbâwkna buatsaih a ni.

Aizawl District Red Ribbon School Quiz Competition 2025 chu Vaivakawn Cultural Center-ah buatsaih a ni a, school level screening paltlang sikul 10 an tel. CLS Academy pakhatna an ni a, pahnihna chu Modern English HSS niin, St James School chu pathumna an ni.

Lungleiah chuan Synod Mission Centre conference hall-ah Red Ribbon Quiz buatsaih a ni a, Lunglei district-a a ti ṭha zual sikul pariat an tel. Pakhatna Christian Education Centre-in Rs 7,000 an dawng a, pahnihna Theiriat Middle School-in Rs 5,000 leh pathumna Zobawk High School-in Rs 4,000 an dawng.

Saitualah chuan Keifang Venghluna YMA Zawlbukah Red Ribbon School Quiz Competition buatsaih a ni a; sikul 11 telin, Oxford English School chu pakhatna niin, pahnihna chu Lailak Secondary School leh pathumna chu Phuaibuang Middle School-II an ni.

Hnahthialah pawh DC conference hall-ah buatsaih a ni a; pakhatna chu Pangzawl High School niin, St Stephen's School leh FD Higher Secondary School-te chu pahnihna leh pathumna an ni.

District level-a Red Ribbon Quiz Competition-a pakhatnate hi September 2-4, 2025 chhunga Mizoram pum inelnaah an district aiawhin an tel dawn. Mizoram puma pakhatna chu Sikkim-a regional level inelnaah an tel ang a, an chet ṭhat dan azirin India ram pum huap inelnaah an tel leh ang.

Red Ribbon Quiz-in a tum ber chu, zirlaite hnenah HIV/AIDS chungchang leh mipat hmeichhiatna hman khawlohna aṭanga natna inkai chhâwn theih chungchang zirtir a, an fihlim theihna tur kawng kawhhmuh a ni.