Buhfai qtl. 1,80,000 vel khawl mek Buhfaiah thlaphânna tur a awm lo: Supply Minister
Food, Civil Supplies & Consumer Affairs (FCSCA) minister John Rotluangliana chuan, tun dinhmunah Mizoramah buhfai quintal 1,80,000 vel chhêk khâwl mek a nih thu sawiin, "Buhfaiah thlaphânna tur a awm lo," a ti.
Vanglaini palai zawhna chhangin minister John Rotluangliana chuan, buhfaiah harsatna a awm lohna turin sorkarin chak takin buhfai a la lut mek zel tih sawiin, "Tunah chuan buhfai dinhmun a ṭha," a ti a, private supplier pawhin tluang taka buhfai a supply theih thu a sawi.
Hetih lai hian, sorkar laipui chuan Mizoram leh Manipur tana Myanmar aṭanga buhfai lak luh tumna chu tihtawp a nih thu July thla tir khan Manipur sorkar a hriattir. Supply Minister chuan, Mizoram sorkarin hriattirna a dawn ve loh thu a sawi.
Thu dawn danin, sorkar laipui leh Myanmar sorkar chuan Mizoram leh Manipur tana Myanmar aṭanga buhfai lak luhna turah inremna an lo siam tawh a, mahse thil dik lo eng emaw a awm avangin sorkar laipui chuan tun hnai khan a titawp a ni.
Zawhna chhangin, FCSCA Minister chuan, mega block vanga buhfaia harsatna awm theia invenna turin Supply Minister a nihna angin Myanmar sorkar a dâwr tih sawiin, "Harsatna a awm avangin tihpuitlin a ni lo," a ti a, Myanmar aṭanga buhfai lâk luh tuma hmalakna chu a tawp vek tawh thu a sawi.
FCI lam pawhin sorkar laipui kaltlangin Myanmar sorkar a dawr ve tho tih sawiin, "Keini'n kan dâwrna leh FCI lamin an dâwrna hi thil hrang daih a ni," a ti.
FCSCA department hotute'n Vanglaini an hrilh danin, private supplier Lalrindika, Zarkawt chuan tluang takin Mizoram sorkarah buhfai a pe thei a; ani hian buhfai quintal khat Rs. 2,575-in a supply a, buhfaite chu Zuangtuia FCSCA kudamah a dah ṭhin.
Private supplier hi thla khatah quintal 80,000 aia tam lo supply tura tih a ni tih sawiin Supply department hotute chuan, "Buhfai chhêk khawl sa a awm ṭhat avangin thla khatah qtl. 80,000 supply tlin kher a ngai lo a, thla hnih/thum vel chhung chu qtl. 40,000-50,000 vel bâk supply a ngai rih lo ang," an ti.