Vawiinah Assembly session

Mizoram Legislative Assembly pasarihna ṭhutkhawm vawi rukna chu vawiin chawhma dar 10:30 hian Assembly House-ah ṭan a ni dawn. Session hian ni thum chhung a awh ang.

Session ṭan ní hian session hmasa leh session neih tur inkara House member lo ni tawh thite sûnna hun hman a ni dawn a, chumi zawhah Finance minister Lalsawta'n thla li chhunga Mizoram sum hman tur 'Vote on Account' a pharh ang.

Sor­kar hotute chuan, Central-in plan fund tur an la tihfel loh avangin budget puitling pharh theih a la nih loh thu an sawi.

Assembly session tur atan hian nimin chawhnu lam thleng khan ziaka chhan chi zawhna (unstarred question) 70 leh House chhunga chhan chi zawhna (starred question) 29 a lut tawh a ni.

Dan dinglai siam ṭhatna tur bill pahnih - 'The Mizoram Motor Vehicle Taxation (Amendment) Bill, 2015' leh 'The Mizoram Municipalities Third Amendment Bill, 2015' leh dan thar siamna tur, 'The Mizoram Entry Tax Bill, 2015' pawh session-a ngaihtuah tur hian a lut.

Dan hman lai 'The Employment of Man­nual Scavenger and Construction of Dry Latrine (Prohibition) Act, 1993' tih paihna tur resolution a lut bawk.