KHAWTHLIR

Thisen pe
Lunglei Bazar Veng Bial KṬP chuan nimin khan Lunglei Bazar Kohhran hall-ah blood donation camp an huaihawt a, Lunglei Civil Hospital tan thisen unit 32 an pe a, a petute mipa 31 leh hmeichhia pakhat an ni.

TNT-ah MHIP Day
Thutak Nunpuitu Team (TNT) chuan nimin khan an hmunpui, Zuangtuiah MHIP Day pualin hun an hmang a; State Bank of India-in TNT dintu Sangthankima hnena chawimawina an pek an lawm nghal. MHIP Day pualin TNT tan hian nimin khan MHIP branch pathum - Bawngkawn, Sihphir leh Keifang ten thilpek an hlan a ni.

Changél phun
YMA leh PHE department-in tuihna humhalh beihpui an thlakna kal zelah, Serchhip Chandmari branch YMA chuan nimin an veng chhunga tuikhura tuihna humhalh nan leh tihpun nan tuikhur hnár leh a chhehvelah changél ṭiak ṭhahnem tak an phun. Tarpi tlang ngaw humhalhna atan mau 100 chuang an phun bawk.

P/S belhbawm
Mamit Venghluna Primary School I leh III chu zirlai an tlem avangin pakhatah sâwi khâwm an ni a; P/S I-a zirlai leh zirtirtute chu P/S III-ah sawn an ni. Thu dawn danin, Mamit Venghlun P/S I-ah hian zirtirtu pathum leh zirlai 21 an awm a, P/S III-ah zirtirtu pathum leh zirlai 11 an awm thung.

HM Zira fak
MPC ṭhalaite chuan thuchhuah siamin, Home minister R. Lalzirliana'n sorkar official-te nena zana Aizawl khawpui chhung an fang kual chu ṭha an tih thu an tarlang a, "Khawpui venhimna kawnga Home Minister inpekna hi fakawm kan ti takzet a ni," an ti.

Reduction sale
Nimin aṭang khan Mizoram puma Synod Bookroom leh Churanchandpur-a Synod Bookroom-ah reduction sale neih ṭan a ni a, lehkhabu leh stationery item-te 5%-80% a discount a ni. Reduction sale hian July 11 thleng a awh ang.