Hnamdang rubotu mi pathum police-in an man tawh

June 4, 2015 zan dar 7:30 khan pánhnah leh kuhva zuar Aklash Uddin chu rukbo a ni a, an hrènna hmun aṭangin a tlân chhuak. Rûkbonaa inhnamhnawih zinga pathum - Thomson Lal­ram­­buatsaiha (29) s/o C Lalnghaihawma, C Zo­hmingliana (29) s/o C Lianzuala leh Lal­lian­mawia (32) s/o PT Kaia, Venghnuai, Aizawl vekte chu police-in an man tawh.

Police aṭanga thu dawn danin, Aklash Ud­din hi Aizawl Mosque-a inkhawm tura a kal tur chu Babutlangah mi paliin car-ah an nam lut a, a nam luttute zinga mi pahnih chu mipui an punkhawm deuh avangin an tlanbo. Aklash Uddin hi Thomas Lalrambuatsaiha leh C Zohmingliana ten Lengpui bula thlámah hruaiin an hreng.

July 5 zing lam khan Uklash Uddin chu a tlanchhia a, Lengpui rama hna thawk mi pakhat nen an inhmu a; an pahnih chuan Lengpui khawtlang hruaitute hnenah thil awm dan an hriattir nghal a ni.

Thomas-a leh Zo­hming­liana te chuan Uk­lash Uddin chu an ûmzui a, Lengpui khaw­tlang hruaitute nen innangchingin, man nghal an ni. An inpuanna bawhzuiin police-te'n Lallianmawia Aizawlah an man leh a, ani hi Babutlanga Aklash an rûkbo laia tlanchhia a ni. An thurualpui dang pakhat erawh chu police-in an zawng mek.

Zawhna chhangin police hotute chuan, mi­sualte hian mi an rûkbo chhan tak an la hriat loh thu an sawi a, "Thu kan la zawtfiah mek a, thu chiang a la awm lo. Misualte kut aṭang hian hmanrua man kan nei lo," an ti. Mi rubotu pathumte hi nimin khan Court-ah hruai an ni.