MHIP Day vawi 41-na hman a ni

Nimin kha Mizo Hmeichhe Insuihkhawm Pawl (MHIP) Day a ni a, Mizoram pumah branch hrang hrangin hlim takin an lawm.

MHIP Day-ah hian branch hrang hrangte chuan an khua leh veng chhung tihfai hnatlang an nei a; branch ṭhenkhat chuan intihlimna hun an hmang. Branch tam takin ṭanpui ngaite an ṭanpui a, branch ṭhen­khat chuan ruai nen an lawm.

Aizawl Chanmari branch chuan an veng YMA Hall-ah hmangin, MJA president Vanlalrema Vantawl-in a hmanpui a; essay inziahsiak an buatsaiha tiṭhate hnenah lawmman an hlan bakah, mi 64 hnenah loan Rs. 5,000 ṭheuh an sem. Loan atan hian an venga mi inphalte'n sum an thawh khawm a ni.

MHIP general headquarters president Lalthlamuani chuan thuchah sawiin, MHIP thupui chu 'Mite ṭanpui' tih a nih angin, hun lo kal zel turah mite'n MHIP chu mite ṭanpuitu, mangang leh puih ngaite tan 'Nu an ni' tia an hriat reng theihna tura thawk turin MHIP member-te a chah.

Lalthlamuani chuan, Mizoram sorkarin inneih leh rokhawm thua dan thar 'The Mizo Marriage Divorce and Inheritance of Proper­ty Act, 2014 a siam leh hmeichhiate tan tualchhung rorelnaa 33% hauh­sak a ni chu lawmawm a tih thu a sawi a; MHIP enkawl Hmangaihte Rûnah naupang pasarih an awm mek tih sawiin, Hmangaihte Rûn leh a chhunga awmte tana ṭawngṭai ṭhin turin mi tinte a sáwm.

Kum 2015-17 chhunga MHIP kumpuan 'Hmeichhia leh nau­pangte hmasawnna leh himna atana nasa taka ṭan lak' tih chu a hlawhtlin theihna atana ṭan la tura MHIP member-te sáwmin, MHIP President chuan, "Faina leh thianghlimna kawngah ṭan la thar leh ila, kan lo hrisel theih nan mimal, chhungkua, khawtlang faina kawngah hmahruaitu nih i tum ṭheuh ang u," a ti.

MHIP general headquarters hruaitute chuan branch hrang hrangah he ni hi an hmanpui a ni.