Nghâk hret turin rilru lama damlote chah

Psychiatrist Dr C Lalhrekima chuan, rilru lama harsatna nei, mahni intihhlum hial duhte chu an rilrua awm anga che nghal mai lo a, an tana hun ṭha nghak hret turin a chah.

Mahni intihlum an awm ṭhin chungchanga zawhna chhangin Aizawl Civil Hospital leh Kulikawn Hospital-a rilru lam natna neite enkawltu Dr C Lalhrekima chuan, "Harsatna reng reng chatuan daih a awm lo a, ri nghal thut loin, ni tharin hun thar a her chhuahpui rualin rilru thar a her chhuahpui hun nghah leh hret tur a ni," a ti.

C Lalhrekima chuan, tunlai ṭhalai rilru nat vanga thih hial duh zingah mipat hmeichhiatna vanga rilru ná te, kawppui nei reng chunga kawp dang neih vanga rilru ná te, leibá vanga rilru natna te, inngaihzawnna vanga rilru natna leh ruihhlo vanga harsatnate a tam tih a sawi.

Dr C Lalhrekima sawi danin, July 2, 2015 zana nun beidawngte tan biakpawha ràwn theih a nih thu social media-a a târ chhuah hnuah nun ning mi 69-in an bia a, chung mite chu ṭha takin an harsatna a sawipui.

Miin harsatna a tawhin dem mai loh tur a ni tih sawiin, "Mi kan indem hma lutuk hi a ṭha lo. An harsatna ngaihthlaksaktu leh puitu nih tum zawk tur a ni," a ti. Mahni intihhlum mai duhna rilru neite'n an harsatna chu an chhungte an hrilh ngam lo fo tih sawiin, "Nu leh pate'n an zir a ngai. Fate'n harsatna an hrilh ngam loh nu leh pa kan nih chuan a pawi dawn a, kan inhawn zau ngam a ngai. An harsatna hriatsak hi nu leh pate mawhphurhna a ni," a ti.

C Lalhrekima chuan, rilru lama harsatna chu natna dang ang bawka damlohna chi khat a nih thu sawiin, "Ruh tliak pawh nghah dam ngai ve tho a ni a, rilru lam natna leh harsatna pawh nghah a, dam mai thei a ni a, thih nghal zel tum bik loin, kan dam leh hun inher chhuak tur nghah ve tur a ni," a ti a; rilru natna neite chu damlo an ni tih inhria a, rilru doctor (psychiatrist) pan nacháng hre turin a chah.

Dr C Lalhrekima chuan, khawvelah kum tin mahni inthat mi maktaduai khat vel an awm thu a sawi rualin, intihhlum tum zingah dam leh pawh tam tak an awm thu a sawi a; Mizo ṭhalaite zingah mahni intâl hnawk vanga rilrua harsatna tawk an tam zel tih sawiin, "Inchhîr lehna tur a ni tih kan hriat hi chu ti lo mai ila. Nun tluang taka hman hi mahni intihhlum venna ṭha ber a ni," a ti.