Chak zawka JNV, Mamit sa turin ngen

Mamit Hmarvenga V/C leh pawl hrang hrangte chuan, nimin zing khan JNV atana Hmarveng Ba­zar building hman mek chung­chang an ngaihtuah a; Mamit Khiangthelha Jawahar Navodaya Vidhyalaya (JNV) tur chu chak lehzuala sak a nih theih nana hma la turin thuneitute an ngen.

Mamit Hmarveng V/C leh NGO-te sawi danin, Hmarveng Bazar (market building) kum 2008 aṭangin JNV-in sikul atan an hmang a; MAMCO Ltd.-in JNV tur sak hna an thawh avangin, an sak zawh hma chu sikul atan Hmarveng Bazar building chu Trade & Commerce department-ah hman an dil a ni.

Trade & Commerce leh MAMCO-te chuan market building chu JNV atan kum thum hmang turin inremna an ziak a, chumi hnuah kum thum dang hmang leh inremna an ziak leh bawk. Inremna hnuhnung zawk chu Febuary 27, 2015 khan a tawp tawh a, mahse tun thlengin JNV atan an la hmang chhunzawm zel a ni.

Meeting chuan, Hmarveng Bazar building chu a nihna ang taka an hman a nih theih nan sorkar thuneitute hnena thlen an rel a, Trade & Commerce leh MAMCO-te chu inremna pawtsei tawh lo turin an ngen.

Mamit Hmarveng V/C leh NGO-te chuan, Khiangthelha JNV sak mek chu chhunzawm a nih theih nana hma la turin thuneitute an ngen. JNV sak mek hi a hmun ram neitute'n sak chhunzawm an phal loh avangin July 1, 2015 khan hna thawktute an chhuahtir a ni.

Mamit aṭanga thu dawn danin, Mamit JNV building hi kum 2012-ah sak ṭan a ni a; school building tur pakhat, staff quarters tur pali, dining hall pakhat, dormitory building paruk, principal quarters pakhat sak mek a ni.