UDPA-in e-office an kalpui tan ta Paper a ngai tawh lo - UDPA Minister

16th November, 2016

Mizorama a hmasa ber turin Urban Development & Poverty Alleviation (UDPA) department chuan internet hmangin e-office an kalpui ṭan dawn a, nimin khan UDPA minister Zodintluanga pisaah a hawng. UDPA Minister chuan, paper chhah pui pui kenkual a ngai tawh dawn lo tih a sawi.

Zodintluanga chuan, "Vawiin hi Mizoram sorkar tan historic day a ni a, ni chhinchhiah tlak a ni. Directorate-ah dealing clerk
aṭangin paper a awm tawh dawn lo. An scan lut ang a, file a kal ang a, Director aṭangin Secretariat-ah e-mail hmangin an thawn ang a, Parliamentary Secretary-ah thawnin ka hnen a lo thleng ang. Pawmpui hnuah e-mail bawkin kan thawn kîr leh dawn a ni," a ti.

E-office-ah chuan paper chhah pui pui ken kual a awm tawh dawn lo tih sawiin Zodintluanga chuan, "Delhi-ah pawh meeting nei ila, file hi internet kaltlangin kan lo en thei tawh dawn. File-te hi 'digital signature' hmangin sign vek a ni tawh dawn a, paper hman lohna a ni tawh dawn," a ti a; e-office hian sorkar sum leh hun tam tak a hum theih tur thu a sawi.

UDPA Minister chuan, sorkaraa thawk turte chu computer thiam vek an nih tawh avangin minister leh parliamentary secretary zingah computer khawih thei lo an awm pawhin an P.A-te kaltlangin e-office chu tih vek theih a nih thu a sawi a, "He hmalakna hian langtlang a keng tel dawn a, eirukna do kawngah a ṭangkai dawn a, kan fimkhur vek a ngai dawn a ni. File tawpna leh tikhawmuangtu hriat zung zung theih a ni tawh ang," a ti.

UDPA joint director James Lalnunmawia sawi danin, e-office hi information technology hmanga nasa taka sorkar kalphung tidanglam leh tichak dawrh thei tur a ni a; kum 2009 khan India ramah Pilot Implementation neiin Haryana chuan an hmang hmasa ber a, July 2009 khan an hmang ṭan.

National Informatics Centre (NIC) chuan e-office chu chi (version) li an siam tawh a, chungte chu - e-Office Lite (e-File), e-Office (Sparrow), e-Office (KMS) leh e-Office Premium te a ni.

UDPA department hian e-Office Lite a hmang dawn a, hmangtu (user) 250 an awm thei dawn a, department-ah user 76 leh Secretariat-ah 15 awmin, user 91 an awm ang.

e-Office Lite-ah hian File Management System (e-File), Knowledge Management System (KMS), Collaboration and Messaging System (CAMS) leh Personnel Information Management System (PMS)-te awmin, a 'support' a ni.