Pawisaa harsatnain ziaawm lam a pan SBI-in damdawi-inah Mini ATM an dah

Rs. 500 leh Rs. 1,000 note tih thih avanga buaina chuan ziaawm lam a pan zel. State Bank of India (SBI) chuan nimin khan damdawi-ina awmte harsatna phuhrûkna atan Aizawl Civil Hospital hung chhungah Mini ATM an hawng.

SBI hotute aṭanga thu dawn danin, Thawhṭanni khan Mizorama ATM 36 chu hman theihin an peih a, nimin khan ATM eng emaw zat chu hman theih turin an buaipui leh a ni. ATM-ah hian Rs. 2,000 tlang pawh dah luh a ni tawh.

Zawhna chhangin SBI hotute chuan, "Pawisa a rawn thlen belh zel a, buainain ziaawm lam a pan zel turah kan ngai. Rs. 500 tlang erawh a lo la thleng lo," an ti.

Hetih lai hian, pawisa thleng tum leh lak chhuah tum bank-ah an la
ṭhahnem hle a, ATM aṭanga pawisa lak chhuah tumte pawh an intlar a, pawisa la chhuak an tam avangin nizan leh nimin zing lamah ATM eng emaw zatah pawisa a awm lo.

Bank ṭhenkhat chu pawisa an neih tam tawk loh avangin pawisa an thleng thei tawh lo a, an bank-a account neite erawh chu bithliah neiin an pe chhuak thei thung.

SBI, Regional Office chuan Aizawl Civil Hospital-ah Mini ATM an hawng a, SBI Bawngkawn Branch chuan Synod Hospital-ah an hawng thung. Mini ATM-ah hian ATM card pakhat hmangin ni khatah Rs. 2,000 lak chhuah theih a ni.

Hetih lai hian, Aizawl Dakinpui pawhin pawisa an thleng mek zel a, dawrtu pawh mi ṭhahnem tak an awm. Nimin lamah kha chuan pawisa nei an nei lo a, Rs. 2,000 note chiah an pe chhuak thei a ni.