Police-te'n mipui himna turin ṭan an la

Mizoram Police-te chuan Krismas leh kumthar lo thleng tura sorkarin thupek a chhuahte kengkawh turin ṭan an la mek a; tunlai hian mipui himna atan hmun hrang hrangah mihring phur chi lirthei khalhtute'n rûi chunga lirthei an khalh leh khalh loh an enfiah ṭhin.

Police PRO Rex Zar-zoliana, Aizawl addi-tional SP thuchhuah tarlan danin, Aizawl khawpuia police station hrang hranga police-te chuan an huam chhungah tunlai hian mihring phur lirthei, a bikin maxicab leh bus khalhtute'n rûi chunga lirthei an khalh loh nan breath analyzer hmangin lirthei khalhtute an enfiah ṭhin a; hei hi hunbi bik awm loin tih chhunzawm zel an tum. Aizawl páwn lama police-te pawhin driver-te an enfiah ve bawk.

Police thuchhuah chuan, khualzin phur lirthei khalhtu, rûi chunga lirthei khalh an man a nih chuan hrem ngei an ni dawn tih sawiin, driver-te chu mipui himna atan rûi chunga khalh lo turin an ngen a; "Kan chuanna motor driver-te'n rûi chunga motor an khalh chuan police station hnai berah hriattir turin kan inngen a, driver man vanga kawng laka khaihlak a awm pawhin mipuite'n kan himna tur zawk a ni tih hriaa police hmalakna thláwp zel turin kan inngen a ni," an ti.

Police-te chuan, hâlpuah leh hâlmawite sorkarin a khapna chu kenkawh turin ṭan an la tih sawiin, a la luttu, zuartu leh kawltute man chhuah an nih theihna turin an inpuahchah tih an tarlang. Sorkar thupek chu mipui vantlang himna tura tih a ni tih hriaa police hmalakna thláwp turin mipuite an ngen bawk.