KHAWTHLIR

Assembly session

Governor Lt. Gen. Nirbhay Sharma chuan, Mizoram Assembly thlasik ṭhutkhawm tur chu December 6-a ṭan turin a ko. Session rei zawng tur leh programme kimchang Bussiness Advisory Committee-in an la duang ang.

Hakha mite lo zin

Hakha, Myanmar-a Chin Youth Organisation (CYO) member 18, mipa 10 leh hmeichhia pariatte chuan November 14, 2016 khan Aizawl an lo thleng a, Central YMA-in an lo dawngsawng. CYO member-te hian Aizawla mi pawimawh hrang hrangte an kâwm kualin an zir chiang dawn a ni.

Website-ah FIR

Mizoram Police-te chuan Supreme Court thupek angin, first information report (FIR) an ziah luhte chu nimin aṭang khan a copy police website-ah an dah (upload)
ṭan. FIR copy-te hi a duh tan www.police.mizoram.gov.in ah en theih a ni.

Art Exhibition

Mizoram Art Development Society (MADS) chuan, nimin khan Aizawl Art Gallery-ah 'Annual Art Exhibition 2016' an buatsaih a, Information & Public Relations director Jim K Chozah-in a hawng. Exhibition pual hian MADS member-te kutchhuak Aizawl Art Gallery, S&S Gallery leh Art Novelty-ah phochhuah a ni.

Florist Flair

Mizoram Florists' Association chuan, nimin khan Vanapa Hall bula Transport department building tur sak mekah Florist Fair an buatsaih a, minister John Rotluangliana'n a hawng. Florist Flair hian November 18 thleng a awh dawn a ni.