Naisingpara-ah Bru enfiah mek

Mizoram aṭanga Bru raltlan, Tripura transit camp-a awmte Mizorama hruai kir tumna kal zelah, nimin khan relief camp lian ber Naisingpara camp-a mite endik ṭan a ni.

Naisingpara camp-a endik hna thawh hi Mamit DC Lalbiaksangi'n a hmunah kal chilhin a enpui a, North Tripura District Magistrate-in a telpui bawk. Bru endik nan hian kum 1995 electoral roll hman a ni.

Nimina Naisingpara camp-a endiknaah hian chhungkaw 277-a mi 1,575 enfiah an ni. Endik zinga chhungkaw 220-a puitling 965 leh naupang 363, mi 1,328 chu Mamit district-a dah tur an ni a; chhungkaw 34-a puitling 137 leh naupang 60, mi 197 chu Kolasib district-a dah tur an ni. Lunglei district-a dah tur chhungkaw 23-a puitling 108 leh naupang 42, mi 150 endik an ni bawk.

Naisingpara camp-ah hian Mizoram Bru enfiah hna hi vawiinah chhunzawm a ni ang.

Bru endik hna hi camp paruk zinga paliah endik hna zawh tawh a ni a, chhinchhiah fel tawh zat chu chhungkaw 1,980-a mi 12,287 an ni. Kaskau camp-ah mi 3,849, Khakchangpara camp-ah mi 1,119-te, Hamsapara camp-ah mi 1,769 leh Asapara camp-ah mi 5,550 enfiah an ni.