MPYCC-in MNF President an chháng

Congress party ṭha-laite chuan thuchhuah siamin, MNF president Zoramthanga'n November 14-a Mizo Hnam Rûna thu a sawiah, Congress sorkar chhungin development a chhe vek anga a sawi chu thu dik lo niin an tarlang a; "Kum 10 an sorkar laia hmasawnna an tihchhiat vek kha a theihnghilh ta mai em ni?" an ti.

MPYCC chuan, MNF kum 10 sorkar chhungin Congress sorkar hmasain bul an ṭo tan tawh Tuirial Hydro Electric Power Project chu 'Lal chhung-kua’ zangnadawmna vang-in tihchhiat vek a nih thu an sawi a; "State Referral Hospital, Falkawna sak tur Congress sorkar hmasaa ruahman chu MNF sorkarin an tichhe vek a, damdawi-in sa mumal loin quarters an sa a, a tawpah kèl leh ar vulhnaah an chhuah a nih kha," tiin, ‘development’ tichhetute chu mipuiin an hriat thu an sawi.

Congress ṭhalai tarlan danin, Tuirial HEP chu Congress sorkarin bul ṭan
ṭha lehin zawh thuai a ni dawn a, State Referral Hospital pawh siam ṭha lehin medical college dinna turin hmalak mek a ni.

MNF kum 10 sorkar chhungin mirethei leh kut hnathawktute thleng phak budget siam a ni ngai lo nia sawiin, MPYCC chuan, "Mizoram Indodelh Project (MIP) an hlawhchhampui ṭhak a, mautàm denchhenin an hotu lute'n sum tam tak an insiam a, mipui hnen a thleng phak lo," an ti a; Aizawlah kut hnathawktute chemtum nen kawng an zawh hial thu an sawi.

Congress ṭhalaite chuan, MNF President chuan 'nationalism' an keng tawh lo tih hi pawm ngam se an duh thu an tarlang a; MNF President-in 'Sorkar
hnathawk 80% chuangin Congress sorkar an ning tawh' tih a sawi chu eng figure, data, survey hmangin nge a sawi
tih sawifiah turin an
phût bawk.