Kum 2017 atangin Sainik School tan dawn

Mizoram sorkar chuan thu-chhuah siamin, Sainik School, Chhingchhipa sak mekah kum 2017 aṭangin zirlai ṭan theih a nih dawn thu a tarlang. Sainik School-ah hian pawl 6 aṭanga
ṭan tur a ni.

Sorkar thuchhuah tarlan dan-in, Mizoram sorkar chuan ṭhalai tam zawkte'n India ram venhimna kawnga thawktu (armed force)-a hna sang zawk an chelh theih a duh a, chumi tihhlawhtlin theihna atana ṭul leh pawimawh tak pakhat chu ṭhalai leh zirlaite kaihhruai leh tah hriam a nih avangin, Sainik School din chu sorkarin tihmâkmawhah a ngai.

Sainik School din tur hian mawhphurtu hrang hrang - Ministry of Defence, Ministry of DoNER, Ministry of Finance, etc.-te chu Mizoram sorkarin a dawr kual a; 13th. Finance Commission aṭangin cheng nuai 4500 leh Non-Lapsable Central Pool of Resources (NLCPR) aṭangin nuai 5064 hmuh a ni.

Sainik School sa tur hian sorkar laipui hnuaia working agency pakhat, Hindustan Prefab Ltd. (HPL) chu ruat a ni. Sainik School Society, Ministry of Defence chuan state sorkar, Sainik School din turte'n hmunhma leh building (Minimum Infrastructure Requirement) an neih ngei ngei tur bituk a nei a; chungte chu state sorkarin a peih a ni tih ti-chiang turin November 4, 2016 khan Sainik School Society-te chuan Chhingchhipa Sainik School sak mek chu an rawn endik a ni.

State sorkar hmalakna chu ṭha tawka ngaiin Ministry of Defence chuan Sainik School, Chhingchhip chu nakkum (academic session) aṭanga zirna ṭan turin phalna a rawn pe a ni.