Chawngte-ah buhfai phurh luh a ni

Kawng chhiat vanga hun rei tak chhung buhfai phurh luh theih lohna Chawngte-ah Thawhṭanni aṭang khan buhfai phurh luh ṭan niin, nimin khan chhunzawm a ni a; ni hnih chhungin truck pangain buhfai quintal 589.3 an phur lut.

Buhfai phurtu truck zinga a ṭhen chuan Thawhṭanni tlai khan Lungleia Supply kudam aṭangin Chawngte an pan a; nimin zing khan truk ṭhenkhat an chhuak leh bawk. Buhfai phur truck-te hi Chhumkhum-Chawngte inkara kawng siam hna thawktu PWD hnuaia Project Implementing Unit JCB-te'n an zui a, kawng chhe lai apiangah kawng thawm ṭhain truck kal theih nan an siamsak a ni.

Lungleia FCSCA department hotute dawi danin, tun hnai ni thum vel kal ta chhunga khua a ṭhat avangin kawng siam hna thawktute'n chak zawkin hna an thawk a ni.

Kar kal taa enchhinna atana LPK truck pakhat, buhfai quintal 48.55 phura Chawngte pana chhuak chuan Inrinni kal ta khan Chawngte a thleng. Chawngte hi Lunglei tih lohah chuan Lunglei district-a Supply kudam lian ber awmna a ni a, thla khat atana an buhfai quota pawh qtl. 2517.22 a tling.

Chawngte-ah hian kawng chhiat lutuk avangin kumin September thlaa buhfai quota hmuh kim theih loh qtl. 730 tiamin October, November leh December thla quota tur belhkhawm qtl. 8181.41 chu kawng ṭhat veleh thawn luh nghal tum a ni.

Hetih lai hian, Lunglei-Tlabung kawng chhiat vanga buhfai thawn theih lohna Tlabungah pawh buhfai thawn theih a ni tawh bawk.