Mamit MJA-in NH-44A an enfiah

MJA, Mamit district member-te chuan nimin khan PWD hotute kaihhruaiin National Highway-44A kawng laih leh lei dawh mek an enfiah a; Mamita IPRO Paul Rokima'n a ṭawiawm.

NH-44A hi Gaytri Infrastructure Pvt. Ltd-in an sial mek a, Dialdâwk lei dawh zawh a ni tawh a, lei dang - Damlui leiah 17%, Teirei leiah 48% leh Tripura dep New Eden khuaa Langkaih lei dawhah hna 4% zawh a ni tawh. Lei dawh mekte hi Langkaih lei tih loh chu kumin fûrpui thlen hmaa an hna khaihlak lo turin a zualpui peih hman an tum thu hnathawktute'n an sawi.

Dampui khàmpui laih mek chu a sang lai berah metre 185-a sang a ni a, metre 37 vel laih a la ngai a, kuminah laih tlang hman tum a ni. Laih tlang a nih chuan, Mamit leh Aizawl inkar kawng chu km. 75 vela thui tura chhût a ni. Tuidam chho hêlna (Tuidam diversion) chu a laih hna (formation cutting) ngawrh taka thawh mek a ni bawk.

NH-44A project estimate hṭum hnih ennawn a ni tawh a, a ṭum thumna atan revised estimate siam turin sorkar laipuiah nawr mek a ni. Kawng siamna atan hian November 25, 2010-ah sanction niin, estimate amount chu cheng vbc. 624.41 a ni a, March 2, 2011-ah hna thawh ṭan niin, zawh hun tura ruahman chu March 17, 2014 a ni.

A tira zawh hun tura tihah zawh a nih loh avangin July 17, 2015 thleng hun pawhsei a ni a, chutah pawh chuan zawh a nih tak loh avangin July 17, 2017 thleng hun pawhsei leh a ni a, siam zawh a la nih chuan loh avangin December 31, 2020-ah zawh turin hun pawhsei nawn leh a ni.