LTF/VTF duty-te Covid-19 vaccine Pêk an nih theih nan hma la dawn

Minister Dr R Lalthangliana hian nimin khan a pisaah MJA General Headquarters hruaitute thingpui inpuiin a kâwm a; Covid-19 vaccine pek turah LTF/VTF duty-te telh an nih theih dan tur chungchanga zawhna chhángin, "Task force-te telh dan tur kawng kan zawng ang. Ningani (January 7, 2020)-a Union Health Minister hoa video conferencing hmanga meeting-ah ka sawi lang ang," a ti.

Thenzawla police Covid-19 vei R Hrang­thanga (40), PTS, Thenzawla IV-Grade hna thawk, November 23, 2020-a thi chu zangna­dawmna pek dan tur ngaihtuah a nih leh nih loh zawhna chhangin R Lalthangliana chuan, "Dan a awm a, danin a huam chin a nih chuan kan ti mai turah ka ngai," a ti. R Hrangthanga hi Bihar Assembly inthlana Mizoram police duty-a kalte zinga mi a ni a, Bihar-a an duty-na aṭanga hripui kái nia ngaih a ni. 

Health Minister chuan, thlasik khawvâwtah Covid-19 chu a pung turah mithiamte'n an ngai tih sawiin, "December thla tàwpah chuan Mizoramah Covid vei mi 5,000 kan chuang ngei turah an ngai a, mahse, sorkar laipuia mithiamte chhût dan hi a dik ta lo a ni," a ti. Thla khata Mizorama Covid-19 vei hmuh chhuah tam ber thla chu November thlaah mi 1,089 a nih thu te, a dawttu chu September-ah mi 1,006  a nih thu leh, December-ah erawh chuan mi 300 vel a nih thu a sawi.

Covid-19 vaccine chungchangah sorkar laipui an khauh thu sawiin Minister chuan, "Ka lo beisei dan chuan tun February vel a ni a, mahse, chumi hma January thlaah pawh a beiseiawm ta a ni," a ti.

Covid-19 donaah Mizoram mipui an ṭang rual ṭha hle tih sawiin, "Covid-19 ang rêng rênga ram mipui, páwl, sorkar hnathawk, mimal, chhungkua kan ṭan rual ṭhatna, min pawt khawm ṭhatu a awm ka ring lo. Covid hian mi tin min béng harh a ni," a ti a; thuthar thehdarhtute pawhin an thawh hlâwk thu sawiin, mipuia zirtirna an pek chu suma pek tur ni se, sorkar tan pek sên a ni lo tih a sawi.

Mizoramin Covid-19 a do dan chu India ram hmun danga mite pawhin mak an tih thu sawiin R Lalthangliana chuan, "Min zawt fo ṭhin. Kristian ram kan ni a, kan Kristianna hian min pawt khawm ṭha a, ṭawngṭaina nen kan ṭangho nasa a ni. Pathian hian mal min sàwm dawn chuan kan thawh a ngai, a malsawm tlakin kan thawkho ṭha a ni. Tu mah kan tlânchhe lo a ni," a ti.

MJA president Zonunsanga Khiangte chuan, mi punkhawm phal zat 35 tih chu mi 50/70/100 vela tihsan chi a ni tawha a hriat thu a sawi a, "Mitthi vuinaah mi 35 aia tam lo pun khawm phal a ni a, hemi chungchangahte hian kan culture leh kan rilrute hi a tikhawlo dawnin ka hria," tiin, mi langsar deuh an thih chuan mi an pungkhawm ṭeuh tho thu a sawi.

Zonunsanga Khiangte chuan, Dr R Lalthangliana chu minister/MLA loh lai pawha MJA ngaihsaktu a nih thu sawiin, "Ani ang hi minister/MLA nih loh lai pawha MJA min ngaihsaktu kan ram hruaitu zingah an awm lo. MJA min ngaihsak ṭhinnaah kan lawm tak zet a ni," a ti.

MJA President thu sawi chungchangah Dr R Lalthangliana chuan, an la ngaihtuah tur thu a sawi a; sikulte pawh ṭan dan kawng an zawng mek tih sawiin, "Kan thlamuan lutuk hian eng emaw a thleng leh ang tihte kan hlau ve bawk a ni," a ti. Sorkar thutluknaah Joint NGO leh MKHC aiawh an tel zel thu leh medical lam mite ngaihdan an lak thu a sawi bawk.

Covid-19 vaccine chungchang sawifiahtu Dr Eric Zomawia, mission director, National Health Mission (NHM) chuan, vaccine chu a hnâi tawh tih bâk an sawi thei lo tih a sawi a, "Central aṭangin instruction kan la dawng lo a, state dangte rualin kan dawng dawn em tih pawh kan la hre lo. Vaccine hian engtia rei nge hri a vên dawn tih hriat a la ni lo," a ti.

Dr Eric Zomawia chuan, vaccine chu vawi hnih lâk tur a nih thu sawiin, "Company thuhmun siam hman tur a ni a, vaccine hi lâk kim tur a ni," a ti a; vaccine dang dahna atana an hman khâwl an neih saah Covid-19 vaccine chu dahṭhat theih a nih dawn thu a sawi.