KHAWTHLIR

Aizawl DC R Lalramnghaka, District Task Force chairman ni bawk chuan nimin khan hriattirna tichhuakin, R Dengṭhuama Indoor Stadium, Hawla Indoor Stadium leh Rajiv Gandhi Stadium-te chu Sports department-in inspection leh ṭul dang atan an hman avangin January 16-31, 2021 chhung quarantine centre atan leh transit camp atan hman a ni dawn lo tih a tarlang. Zin veivâk Aizawla lutte chu transit camp-a inhriattir tawh loin, quarantine facilitation centre pan nghal tur a ni. 

Assembly Speaker Lalrinliana Sailo hoin nimin khan Mizoram Legislative Assembly Secretariat thawkte'n kum 2021 atana inhlanna hun an hmang. Inkhawm hi Assembly secretary H Lalrinawma'n a kaihruai a, Speaker bakah, deputy speaker Lalrinawma leh additional secretary Lalhmahruaia Zote ten thu an sawi a ni.

Aizawl North-II bialtu MLA Dr Vanlalthlana chuan January 4, Thawhṭanni khan Ramthar Veng YMA Committee Room-ah a bial chhung veng ṭhenkhata YMA branch-te hnenah CCTV a hlân. CCTV hi MLA fund aṭanga lei a ni a, Ramthar Veng, Ramthar North leh Aizawl Venglai branch YMA-te hnenah pek a ni. .

Congress ṭhalaite chuan thuchhuah siamin, bungraw phur lirthei intlàn chhâwk chu titàwp turin sorkar an phût tih an tarlang. "Covid-19 vanga Mizorama March 2020 aṭanga total lockdown leh khuahkhirhna hrang hrang avangin sumdawng, ei chawp zawng leh mi tinin harsatna nasa tak kan tawh hnu hian sorkar hian mipui tan ruahmanna ṭha zawk a neih kan phût. Mizoram sorkar hian bungraw phur lirthei intlân chhâwk hi a titawp lo a nih chuan harsa taka loan an rulh hi ngaihdamsak rawh se," an ti.