Ramri hung central thuneihna, hmalak mek a ni - Home Minister

Home minister K Sapdanga chuan nimin khan Assembly session-ah ZPM member VL Zaithanzama zawhna ziaka chhangin, India (Mizoram) leh Myanmar ramri hung chu sorkar laipui thuneihna a nih thu tarlangin, "Hmalak mek a ni," a ti.

Home Minister tarlan danin, ramri hung chu sorkar laipui thuneihna a nih angin, ramri hung tumah hian state sorkar, ramri vengtu Assam Rifles leh Border Road Organisation-te nen inrâwn tlangin, kalpui dan turah hmalak mek a ni.

August 11, 2025 dinhmun angin, Myanmar aṭanga sahimna zawnga Mizorama rawn râltlân mi 29,046 an awm a; Myanmar aṭanga rawn raltlante chhinchhiahna atan a hranpain sum hmuh a awm lo.

Raltlan chhinchhiahna, biometric enrolment chu hi district tinin an ṭan tawh a, an thawk mek; raltlan chhinchhiah zawh hun tur erawh sawi theih a la ni lo.