State ramri buai chingfel turin Mizoramah inbiak tum a ni - HM

Home minister K Sapdanga chuan nimina Assembly session-ah MNF member K Laldawngliana zawhna chhangin, Mizoram leh Assam ramri buai chingfel turin official level-in Mizoramah inbiak leh tum a nih thu House a hrilh.

K Sapdanga chuan, Mizoram leh Assam ramri buai chingfel turin state pahnihte kum 1988 aṭangin vawi 10 chuang an inbiak tawh thu a sawi a, "August 9, 2024 khan Mizoram sorkar leh Assam sorkar aiawhte chu Mizoram leh Assam ramri buai chungchang sawihoin Mizoramah an inbia (high level meeting) a ni," a ti.

Ramri buai chingfel turin state pahnihte April 25, 2025 khan official level-in Guwahati, Assam-ah an inbiak thu sawiin Sapdanga chuan, "Ramri buai chingfel turin official level-in Mizoramah inbiak leh tum a ni," a ti a, inbiak hun erawh ruat a la nih loh thu a sawi.

Home Minister tarlan danin, state ramri buai chingfel tur hian state pahnihte an inbiak bakah, lehkha hmangin document indil tawn leh inpek tawna hmalak reng a ni. Hemi atan hian study team din a ni a, study team-in India ram hmun hrang hrang aṭangin Mizoram ṭanhmun tichak turin dcoument-te la khawmin hma an la reng a ni.

Mizoram leh Assam ramria Mizoram sorkarin kawng a laihte a ṭul dan azirin hman leh enkawl zui zel a ni a; state pahnihte'n joint statement fel tak an nei a, status quo leh joint statement kalhtua ṭan a rem loh avangin enkawl leh hman zui remchang lote pawh a awm.

Mizoram sorkarin Mizoram ramria a pawm chu Agust 20, 1875 notification, Inner Line on the Southern Frontier of District of Cachar-in a tarlan chin a ni.