Mimal damdawi-inte'n cashless an la pawm ngei kan beisei - Health Minister

Nimina Assembly session-ah Health & Family Welfare minister Lalrinpuii chuan, mimal damdawi-inte'n pawisa pek lâwk ngai lo (cashless) hmanga damlo enkawl chu an la pawm ngei an beisei thu House a hrilh.

MNF member Robert Romawia Royte-in Mizoram Universal Healthcare Scheme (MUHCS) zawm lo private hospital-ahte MUHCS hman a nih loh vanga mipuiin sum an sên zat a zawhna chu Lalrinpuii chuan, private hospital-a damlote sum sen zat sorkarin a chhût loh thu a sawi.

Zawh belhnate chhangin Health Minister chuan, mimal damdawi-inte'n MUHCS an la zawm loh chhan ber chu cashless an duh loh vang nia a lan thu a sawi a, "Keini chuan kan policy a ni a, mipuite hamṭhatna atan cashless ngei kan duh kan ti thung," a ti.

Lalrinpuii chuan, MUHCS chungchangah mimal damdawi-inte nen an la inbiak reng thu leh cashless an la pawm ngei an beisei thu a sawi bawk.

Health Minister sawi danin, tun dinhmunah MUHCS hnuaia Mizoram sorkarin damdawi-in a thawhpui (empanelled hospital) Mizoramah damdawi-in 11 leh day care pathum, state pawnah 25 leh deemed empanelled hospital 13 a awm a ni.