KHAWTHLIR

Sorkarin district thar hawn a tum lo

General Administration department changtu chief minister Lalduhoma chuan nimina Assembly session-ah INC member C Ngunlianchunga zawhna chhangin, tun dinhmunah sorkarin district thar hawn tumna a neih loh thu House a hrilh.

TRC-in thisen pe

T Romana College NSS chuan kumina a vawi hnihna atan nimin khan an college-ah thisen pek an huaihawt a, Civil Hospital, Aizawl tan thisen unit 114 an pe a, petute mipa 76 leh hmeichhia 38 an ni.

Sorkar leiba zat

Finance changtu chief minister Lalduhoma chuan nimin khan MNF member K Laldawngliana zawhna chhangin, kum 2023-24 aṭanga 2025-26 (August 20, 2025 thleng) chhungin hmun hrang hrang aṭangin Mizoram sorkarin cheng vbc. 5,107.12 a pûk tawh thu a tarlang.

LADC-ah EM thar

Lai Autonomous District Council-a executive member atana ruat thar mi pakua chu August 26, Thawhlehni khan rinawmna thu tiamtira lak luh an ni. EM tharte chu Sanghuliana Mualchin (Lungtian), C Rongura (Vaṭhuampui), C Lalsawmzuala (Lawngtlai Chandmary), Andrew Laltlanzara (Chawngte P), Lalropuia Chinzah (Lawngtlai Bazar), L Daniala (Bualpui Ng East), C Hrangthianga (Lawngtlai College Veng), HC Lalthawmliana (Diltlang South) leh H Lalmuansanga (Tuithumhnar) te an ni.

Red Ribbon Quiz

MSACS bultumin Siaha District AIDS Prevention and Control Committee chuan nimin khan MADC Golden Jubilee Hall-ah district level Red Ribbon Quiz Competition an buatsaih a, Siaha chief medical officer Dr Lalnunziri'n a hmanpui. Intihsiakah hian sikul pakhua an tel a, Siaha Higher Secondary School aiawhte pakhatna niin, anni hi state level intihsiakah an district aiawhin an tel ang. Siaha HSS hian lawmman Rs 7,000 dawngin, pahnihna Grace Academy School-in Rs 5,000 leh pathumna ECM HSS-in Rs 4,000 an dawng a; thuchei leh medal an dawng ṭheuh bawk a ni.