Rêl station-ah Taxation centre siam rawt

Mizoram Legislative Assembly-a Subject Committee III-in Finance department (Taxation) chungchanga First Report an siam chu nimin khan an chairman Jeje Lalpekhlua'n Assembly House-ah a pe lut. Committee hian rêl chawlhhmunah Taxation centre siam an rawt.

Subject Committee-III hi tun sorkar term kal mek (9th Assembly)-ah ṭum sawm 12 an ṭhu tawh a, spot visit vawi khat leh department pathum hotute departmental discussion ṭum nga an neihpui tawh. Chung aṭang chuan report leh rawtnate siamin, Assembly House-ah an thehlut a ni.

Subject Committee-III Report-ah hian Mizorama chhiah hmuh tlakhniamna te, chhiah khawn tur tam tak hloh vanga mipuiin tawrh theihna te, Taxation Commissionerate thawm ṭhat a ṭulnate leh an ngaih pawimawh dangte an tarlang.

Report-ah hian, bakijai/certificate officer-te kuta pending case Rs 70,61,22,970 awm thu leh, hei hi department-te'n an lo chhinchhiah a pawimawh thu an tarlang. The Mizoram Public Demand Recovery Rules-ah mipuite'n bakijai-te hmalakna an hriat chian theih nan House-ah Annual Report pharh tura provision siam te, Taxation department thuam chak te, rêl chawlhhmunah Taxation centre siam te, GST Act-in a phût anga service sector hrang hranga chhiah la tura hmalak rawtna an tarlang bawk.

Subject Committee III-ah hian member paruk - W Chhuanawma, Dr K Beichhua, Lalchhuanthanga, Lt.Col. Clement Lalhmingthanga, R Rohmingliana leh Baryl Vanneihsangi te an tel a ni.